Herriko bestak

Oroitarazten dugu urriko lehen asteburu huntan ditugula, ostiral arratsetik igandera (egitaraua joan den asteko Herrian ikus).

Haatik astelehenean 60 urtez goitiko herritarrak gomitatuak dira atsaskaria elgarrekin hartzera “On egin” herriko jantegian.

Aurtengo bestak ere herritarren egunarekinbururatuko dira urriaren 20an igandearekin. Izena emaiteko deitu Anais Casemajor (07-60-36-75-49) edo Amaia Haramboure (06-32-92-57-04)

Besta on deneri!

ELBren pesta Izturitzen

Euskal herriko Laborarien Batasunaren urteko besta joan den igandean iragan zen herriko gelan. Jendalde ederra elgarretaratu zen eta adineko batzuek zioten usaian baino kasko beltz (gazte) gehiago bazela, horrek esperantza emaiten diotela geroari begira.

Laborari eta sustatzaile elkartasunean besta goxoki egitearekin batean laborarien nekezia eta arranguren aipatzeko parada ere izan zen, bazkal ondoko mintzaldi eta lekukotasunekin.

Oroitarazi da Laborantza Ganbarako bozak heldu den urte hasieran beharrak direla, hutsegin behar ez den parada Euskal Herriko laborantza berezia zaindu nahi bada. ELBkoak laborari guzien laguntzeko prest daudela, beharrean direnak batasuneko kide izan edo ez.