Sortze

Andrea eta Benoit Lascano andere jaunek Rafael Esteban deitu duten semeari ongietorria egin zioten, joan den buruilaren 20an. Benoit Lascano dugu Olaizola garajearen parean plantatua den mahasturu eta enpresaburu gaztea. Bikotea Urketako eiheran bizi da, Bastidako bidean. Goresmenak burasoeri eta bizi luze eta zoriontsua Rafael Esteban sortu berriari.

Eztabaida publikoa, urriaren 11n (19:00)

Mugaz gaineko herrien arteko birazkatzeak, zertako? Nola sortu ziren? Zertan dira gaur egun? Nola biziarazten diraeta zer sentsu dute? Geroari begira, zer? Biziarazi behar edo nahi dituguia? Transmisioa nola bermatu?

Orain arte birazkatuak diren herri ezberdinen lekukotasunak bilduko dira eztabaida publikoan.

Beltzuntze elkarteak, Herriko Etxeak, Udalbiltzak eta Euskal Irratiek antolaturik. Animatzailea Jojo Bidart izanen da. Urriaren 11n ostiralarekin (19:00), ongi etorri deneri Aiherrako Gaztetxea gelan!

Aiherra-Antzuola 40 urte: izenak urriaren 11 aitzin

1984an hasi ziren Aiherra eta Antzuolaren arteko lehen kontaktuak, lehen elkarretaratzeak, lehen bestak. Geroztik urak egin du bide, urtez urte antolatu baitira elkarretaratzeak, sortu proiektuak eta aurten handizki ospatuko dugu bi herrien arteko birazkatzearen 40. urtebetetzea. Hau iraganen da urriaren 19an larunbatarekin, antzuolarrak askariarekin errezibituz (10:00), Herriko Etxean 2 herrien arteko 3. hitzarmena izenpetuz, bi herrien arteko jokoak proposatuz herriko plazan (11:30), aperitifa eskainiz Denen Etxeko gelan (13:00), eta bazkariarekin segituz toki berean (14:30) hau Kuxkuxtu txarangak animaturik (prezioa 15€). Haurrentzat bazkari hotza izanen da 5€tan.

Izenak aitzinetik eman behar dira, urriaren 11 aitzin Herriko Etxera deituz (05-59-29-64-02) edo mail bat igorriz: mairie@ayherre.fr. Ongi etorri deneri!

Kantu tailerrak 7 urtetik 11 urte arteko gazteentzat

Aurten ere, Beltzuntze elkarteak, 7 urtetik goitiko aihertar haurrei edo gazteei zuzenduriko kantu tailer edo ikastaldiak proposatzen dizkie, 2013 eta 2017 urteen artean sortu haurrentzat: 2024/2025 ikasturteko bakantza ttipietan iraganen dira (abenduko bakantzetan ez da izanen), 2 goizez, oren bat eta erdi goizka. Tailer hauen helburua haurrer kantuaren gustua emaitea da, eta zendako ez bokazio batzuen sortaraztea. Tailerrak euskaraz izanen dira, Pantxix Bidart kantariak ditu eramanen.

Interesatuak direnek, izena urriaren 11 aitzin eman behar dute mail huntara idatziz: beltzuntzeelkartea@gmail.com, eta haurraren adina eta burasoen telefona zenbakia emanez. Lehen tailerrak urriaren 21 eta 22an izanen dira, goizarekin (10:00-11:30) herriko kantinan. Prezioa: 5€/haurka.