Ahapetik emankizunean Marie Agnés Gorostiague irratilariaren galderei ihardestean, Peio Iralour donazahartarrak laborari gazteei kontseilatzen die ez sobera diru mailegatzea, zeren etxaldeko mozkinak aski onak izanez baizik ez baitituzte maileguak itzultzen ahalko. Peiok zioen bezala, aitzinetik ezin baita segurtamenik ukan mozkinen heina beti aski gora egonen dela. Zor handiegiekin ez dira bakarrik etxalde eta lantegi zonbait. Aspalditik dakigu Frantziar Estatuaren zorra urtetik urtera goitituz doala, bainan eskuineko ala ezkerreko gobernuek berdin segitzen dutela zonbait gauzentzat dirua burrustan ixuriz, bereziki armada eta polizia indarrentzat. Aurtengo zentzugabekeria baizik ez dugu aipatuko. Noumeako hitzarmena hautsiz eta kanakiarren ikusmoldea gutietsiz, Macronek sua piztu baitu Kaledonia Berrian, nork daki zenbat miliun euro gosta den lurralde hartara hamahiru hil eta ehunka zauritu eragin dituzten indar armatuen igortzea? Eta joko olinpikoen karietara erakutsi fantesiak oro?

Untsalaz lehentasunetan izan behar luketen ospitale, osagarri zerbitzu, kalitatezko elikadura eta hezkuntzaren beharrak nola aseko ditu zorra ezin jasana bilakatua zaion Estatuak? Gobernu berriaren asmoetan da diru sartzeen emendatzea eta gastuen ttipitzea, bainan nola ote? Aipatua izan da irrati libreei eman laguntza apaltzea; hots herritarren eskubideak ostikatzea eta nunbaitik ere batasun ttikien kaltetzea. Azken berrien arabera, elkarte andana mugitzeari esker, ondorioz gobernuak gibelera egin omen dezake. Frantziaren zorra estaltzen laguntzeko aipu da ere Herriko Etxe eta Eskualdetako erakundeei indar berezi bat eskatzea. Alta horiek ez direlarik Estatuaren kudeantza txarraren hobendun. Euskal Elkargoaren baliabideak apaltzearen beldur da J.R. Etchegaray. Departamenduen egoeraz kezka bertsua dauka J.J. Lasserrek. Nola ihardukiko ote dute? Gobernuaren jukutrien aurka altxatuko direa, ala azkenean amore emanen dute, onartuz beren zerbitzuen murriztea?

Euskal Herriari doakionez, tenorea jina da gure artean sakonki gogoetatzeko nolako egitura politikoa beharrezkoa zaigun gutieneko burujabetzarentzat. Egia erran, badira bi gogoeta talde. Abiatu berria den Bat gara, abertzaleez osatua eta Euskal Herri osoari begira ari dena. Bestea aldiz, berriz biltzen hasia den Batera mugimendua, hau Iparraldeko egoerari mugatua. Araudi bereziko lurralde kolektibitatea sortzea lehen urratsa litzateke. Haatik, gainerateko eskuduntzei baitezpada juntatu behar litaizke energia eta uraren eskumen osoak. Ber denboran behatuko dugu Korsika autonomia erdiesteko bidean doanez. Gure aldarrikapenak Parisen entzunarazteko, lehen aldikotz hor ditugu elgarrekin lanean ari diren hiru deputatu eta senatari bat. Beraz, gure ahal guziekin hortara berma gaitezen, pegeserietan denborarik galdu gabe!