Olerkia

Huna Emazteek Diote elkartearen desegitearen karietara, Txomin Hegik idatzi olerkia:

Emazteek Diote elkartearen omenez

Emazteen faborez nahi nuke kantatu

Bertso bat edo beste hemen plazaratu

Ene harrokeria aurretik barkatu

Hitza ez nuke nahi monopolizatu

Zuen elea aldiz hotsez sustengatu.

Emaztea askotan gizonen menpeko

Burua buluzirik azoten meneko

Kanpoan eta etxean lanean aritzeko

Egunaz eta gauaz preso egoteko

Ukaldien azpian lurrean hiltzeko.

Emazteek Diote elkarte suharra

Berrogei urtez pasa artatuz sugarra

Elkartasuna eta zuzen den oldarra

Eihartzetik mundura hedatuz indarra

Me Too baino lehen joz ozen deiadarra.

Nahiz gaur hesten duzuen zuen elkartea

Zuen ondotik ez da moztua katea

Nahi badugu bihar alda gizartea

Ez dugu galdu behar zuen izatea

Gizonaren geroa baita emaztea.

Erakusketa

Asteburu huntan Irkus-en obrak ikusten ahalko dira oraino, ondotik urtero agertzen den Melisandre Bert anderearen ekoizpenak ikusgai izanen dira Choribit gelan azaroaren 12tik 24ra. Eguberriko oparieri pentsatuz bezala, hunek eskulan desberdin andana proposatzen du. Apainketa puskak eta bitxiak egiten ditu gai arrunt desberdinekin: betona, makramez, harriak, errexina eta papera.

Goiz guziz (9:00-12:00) idekia izanen da eta arratsaldez (14:30-18:00).

Haritz Barne

Haritz Barne zinemaz arduratzen den taldeak bulta huntan nahi zuen zerbait egin egoitzaren sartzearen apaintzeko. Yann Chatelin artistak haien galdeari ihardetsiz, zonbait obra proposatu dizkio taldeari. Hunek dantzari batzu erakusten eta idazketa sinbolizatzen dituen obra du hautatu. Arras bixia eta alegera den obra hau orori eskainia da orain. Iragan hilabetean estreinatua izan da.