Herriz Herri - Ahetze (L) | 2025eko Urtarrilaren 23a
Ramuntxo Labat-Aramendy auzapez
Aitzineko kontseilua desegina izanik, bozkak egin behar izan dira herrian. Hiru zerrenda ziren lehian: Ahetze Bihotzetik (Laetitia Guesdon-Michaud buru, Philippe Elissalde auzapez ohia ere partaide), Ahetze Zuekin (Ramuntxo Goyhetche axuant ohia buru) eta Ahetzen (Ramuntxo Labat-Aramendy buru, EH Bai alderdiak sustengaturik). Bi itzuli behar izan dira hautaketa trenkatzeko. Eta bigarren itzulian (parte-hartzea %63), urtarrilaren 12an, Ahetzen zerrenda atera da lehen (471 boz, %44), Ahetze Zuekin bigarren (397 boz, %37) eta Ahetze Bihotzetik hirugarren (193 boz, %18). Ahetzek auzapez berri bat badu beraz, Ramuntxo Labat-Aramendy, 45 urteko abertzalea. Eta ekipa berriak Santiago Capendeguy ukanen du Euskal Elkargoan ordezkari. Hamalau hilabeteren kargualdia herriko kontseilu berriarentzat, 2026an izanen baitira herriko bozak herri guzietan.
