Isabelle Rebours eta Iker Elosegirekin topaketa

"Saiak" batasunak aurkeztuko dauku berriki bururatu duen lan bat Itsasuko saieri buruz. Arrokagaraiko kaskoan harrapatu dituzte eta GPS sistemarekin markatu eta segitu, zonbait frango urrun joan direlarik. Isabelle Rebours anderea izanen da elkartearen ordezkaria.

Bere aldetik, Iker Elosegik aurkeztuko dauku berriki argitaratu duen liburua Euskal Herriko faunari buruz.

Hau guzia ostiral huntan urtarrilaren 24an (19:00), Sanoki gelan. Sartzea urririk. Herriko Etxeak antolaturik.

Madagaskar-en aldeko gaualdia

Amadea elkarteak antolatzen du gaualdia larunbat huntan, urtarrilaren 25ean, 19:30etatik goiti, Sanoki gelan. Elkarte hunen helburua da Madagaskar lurraldeko haurren heziketa eta garapena laguntzea. Aitzineko urtetan ere antolatu izan du gisa huntako gaualdi bat.

Hango berriak ere baditugu, hemengo familia bat izan baita tokira eta bisitatu elkarteko bi harrera zentroetako haurrak eta langileak. Bestalde, Tananarivetik kilometro gutira, Amadeak parte hartzen duen laborantxa eremuan, teknikari gazteak trebatuak izan dira jadanik plantan diren laborarien laguntzeko edo elkarteetan sartu nahi dutenen laguntzeko.

Eskolek haurren babesleekin funtzionatzen dute, feriak laborari ekoizpenekin egiten dira, bufandak ehunduak dira, fruitu idorrak, esentzia olioak, konfiturak eta salboinak ekoiztuak eta merkaturatuak dira. Hori guzia Itsasuko familia horrek bere begiz ikusi ahal ukan du, tokian berean.

Zatozte beraz kantatzerat eta dantzatzerat Madagaskar-en alde. Kantariak eta musikalariak izanen dira Yodi taldea, Folkablok taldea eta Boza taldea. Sartzea bakarrik: 5€. Sartzea eta janari malgatxea: 10€.

Elkarteak bihotz-bihotzez eskertzen ditu boluntarioak, kantari eta musikariak, berdin Les Vieux Machins, Idekia eta Itsas Arin elkarteak, bai eta ere Herriko Etxea beren laguntzagatik.

Ate idekiak

San Josep eskolako ate idekiak otsailaren 1ean larunbatez (9:00-12:00), iragaitekoak dira.