Aritz Ibarra Donapaleuko mediatekan

Zabalik elkarteak gomitaturik, Aritz Ibarra Gasteizko marrazkilaria, Amikuzerat heldu zauku asteburu honetan "Aldaxka pozoituak" komiki berriaren aurkezpena egitera.

"2014ko azaroaren 11 da, Lehen Mundu Gerraren armistizioaren urteurrena. Urtero bezala, Urruñan gerla hau oroitarazten duen monumentuaren pean bildu dira zenbait herritar. Frontean hil ziren soldadu haien patriotismoa eta balentriak goraipatu dituzte bertan. Gauean baina, iluntasunak kaleak estali dituenean, oroitarriko pertsonaiek bizia hartu eta gertatutakoaz mintzatzen hasiko dira, orain arte itzaletan izan diren bizipenak argitara ateratuz. Murgil zaitez Frantziaren menpeko euskal lurraldeak bete-betean kolpatu zituen eta belaunaldi oso bat xehatu zuen gertaera ikaragarri honetara."

Aritz Ibarrak, joan den urtean Urruñan egin zuen egonaldia Udalbiltzak antolatu "Guretik sortuak" ekimenaren karietara. Orduan hasi zuen komiki honen giroa lantzen, eta horra non azaro honetan ekartzen digun, bero-beroa labetik jalgia, komiki oso baten oparia.

Azaroaren 9an Donapaleuko mediatekan (10:30) dugu hitzordua Aritz eta bere obrarekin. Gerla handian galdu hainbat eta hainbat gure familietakoak gure maneran oroitzeko parada ezin hobea...

"Bereterretx" Pier Paul Berzaitzen ikusgarria

XV. mendeko Xiberoko eresi bikainak inspiraturik, kantu eta dantza ikuskizun honek bi dantza talde (Gipuzkoako Oinkari eta Xiberoko Berritze Hats) eta kantari talde bat (Jean-Michel Bedaxagar, Michel Arotce eta Magali Zubillaga besteak beste) elkartzen ditu. Musika taldea Philippe de Ezcurrak zuzentzen du eta honek musika gehienak sortu eta harmonizatu ditu.

Pier Paul Berzaitzen ikusgarri hau ibiakoitzean (20:30) eta igandean (17:30) ikusten ahalko da Donapaleuko zineman.

Ondoko hitzordu zenbait Amikuzen

- "Ez dok Hiru" antzerkia Kitzikazank taldeak antolaturik, azaroaren 17an igande arratsaldean (17:00), Domintxineko gelan. Mikel Martinez eta Patxo Telleria antzerkilariek, Euskal Herriko musikaren eta kantuen errepaso ironiko, absurdu eta dibertigarria eskainiko digute. Bi irriren artetik, botza berotu nahi baduzu, zato gustian antzerki hunen gozatzera! Ondotik jateko eta edateko izanen da.

- "Amikuzeko eskolen topaketa" azaroaren 22an ostiral arrastirian (18:30), Donapaleuko zineman ikus dezakegu. Amikuzeko ikastola eta eskola elebidunetako haurrek ikusgarria eskainiko dute. Gaualdia Zabalik elkarteak antolatzen du, andereño errient eta errientsen engaiamenduarekin eta Urtaroaren laguntzarekin.Kantu, dantza, bideo eta antzerki bidez Nafarroako historia kontatuko digute. Ondotik, krakada eskainia izanen da.

- Bihotzeko ostatuen aldeko kantaldia azaroaren 24an (15:30) Donapaleuko zineman. Hor ariko dira: Debru zaharrak, Lea eta Anuxka, Berçaits anaiak eta Pil Pil.