Kontseilu biltzarra

Joan den ortzegunean iragan da Lapurdi gelan 26 hautetsirekin, azken hiruek poderea emanik lagun bati. Aho batez onartuak izan dira mintzagai guziak. Huna zoin ziren:

- Hiribehere karrikaren berrantolaketarako lur zati baten erostea Vanderchmitt jaunari euro sinbolikoan.

- Arruntzan, Musugorrikoborda gunean lur eremu baten saltzea. Hiru promotore ziren lehian. Egin dituen proposamenen ondotik, COL erakundea hautatua izan da 24 bizitegiren eraikuntzarako (4.407.522 eurotan), hamabi bizitegi sozial izanen direla alokatzeko eta beste hamabiak sarbide sozial bezala.

- Guadalupea gunean lur eremu baten saltzea Alain Toffolo enpresari lan gela batzuen eraikuntzarako (140.000 euro).

- SPL, Euskal Gizarte publikoaren antolaketan akziodun hitzarmenaren eta araudien aldaketak. Helburua gizartearen kapitala emendatzea, akziodun berrien sarraraztea, adibidez Baigorri, Beskoitze, Makea herriak, Bil Ta Garbi sindikatua eta Euskal Elkargoaren parte hartze gehigarria lortzea. Helburu horrentzat gizartera herriko hautetsi bat izendatu behar zen eta aho batez Mikel Goyenetche hautatua izan da.

- Ekintza ekonomikoetan telekomunikazio azpiegiturentzat eremu publikoaren okupatze zergaren finkatzea.

- Energia berriztagarriak azkar eremaiteko guneen identifikatzea. Toki publiko batzuetan ondoko denboretan ikus daitezke panel fotovoltaikoak (Super U-ko aparkalekua aipatu da), haize errota batzu (ttikiak) han edo hemen, geotermia edo egurreko erregaiekin Landagoienen, San Josep lizeoa edo berdin Herriko Etxea. Proiektuak oro bederazka aztertuak izanen dira hirigintzako planoaren errespetatzeko eta erabakiak jakinaraziak suprefetari eta Euskal Elkargoari.

- Txirrindula elektrikoen erosleeri diru laguntza ekartzea (1 oraikoan).

- ''Uztaritze Sentsu Ona'' alderdian Aurélie Bontan hautetsiak uzten du lan talde batzordetan zituen karguak. Ondorioz Jean François Ruyz sartzen da hirigintzako, bideetako eta obren lan taldean, Maritxu Elissalde aldiz hezkuntza, formakuntza eta gazteriaren lan taldean.

Bukatzeko ordezkaritzen ahozko bilduman aipatu da Uzta Hitzan festibala azaroaren 22an hasiko dena, kantaldi, musikaldi, mutxiko dantzaldi eta abar... Ondoko egunetan aipatzeko.

Hurrengo biltzarra abenduaren 11n iraganen da.

Obrak bidetan

Hiribehereko karrikaren obrak aitzinatuak dira. Espaloien bukatzeko erabilia den betun berezia ezin dela aro txarrarekin egin jakin da. Azken egunetako euriteen ondotik doi bat atzerapen hartu dute lan horiek, bainan laster ikusiko da amaiera. Bere aldetik departamenduko zerbitzuek hasia dute Super U saltegiaren eta Bazterkarrika bidearen juntako borobilgunea. Jada ageri da zertsu eremu hartuko duen. Oraino ibiltzaileentzat ez bada sobera trabarik, geroxago zailago izaiteko arriskua badago. Hartu beharko da pazientzia eta zuhurtziarekin ibili. Obra horrek iraun behar luke abendu erdiraino.

Pilota

Ezkerparetan joko garbin edo atxiki ttipian Euskal Herriko txapelketa hasten da hilabete huntan. Kapito Harri elkarteari doakionez hamar pare izanen dira lehian: kimuak hiru, gaztetxoak, gazteak, eta artekoak talde bedera eta helduetan maila desberdinetan lau. Erran gabe doa hemengo ezkerpareta gehienak bisitatuak izanen direla eta finalak jokatuko dira urtarrileko bigarren partean denak Baigorrin. Suerte on gure pilotarieri.

Kontzertu

Haltya jauregiaren 150 urteen kari ospakizunek segitzen dute. Azaroaren 16an kontzertua emana izanen da jauregian berean (17:00). Odile andere kantariak emanen du Barbara kantaldia pianoan Nicolas Viellek lagunduko duela. Sartzea libro izanen da, bainan tokiak mugatuak izanez gomendatua da erreserbak egitea helbide huntara: haltya@orange.fr. Ongi etorri deneri.