Heriotze

Agorrilaren 14an bere azken egoitzara segitua izan da Basasagarreko Koxe Urriza. 68 urte zituen. Minbiziak eraman du denbora labur barne. Aitamak Aritzakungoak zituen biak. Basasagarreko bederatzi haurrideetan bigarrena zen. Orain dela hogoi urte Donazaharrera joana zen bizitzera, Michèle Malagane bizilagunarekin eta Laurence hunen alabarekin. Ofizioz aizkolaria zen Koxe eta baratzegintzan ere bazuen trebetasun. Ehorzte elizkizunean jendalde ederra jin zaio atxikimenduz. Gure partetik ere hemendik agurrik zintzoenak familiari.

Yoga kurtsoak

Badu orain bederatzi urte Pantxika Pratek kudeatzen duen OMA elkarteak (“Osasuna, Maitasuna, Askatasuna”) yoga kurtsoak antolatzen dituela Bidarrain, Ortzaizen, Baigorrin eta Izura-Azmen: tantra atelierrak, trantze dantzak, arnas holotropikoak, zeremonia xamanikoak eta beste.

Bidarrain, yoga kurtsoak hasiko dira buruilaren 15ean, astelehenez (19:00-20:00), Arrume gelan. Lehen kurtsoa urririk izanen da. Ondotik kurtsoak beti astelehenetan iraganen dira: 9:30-10:30 eta 19:00-20:00. Geroxago ate idekiak ere (mintzaldi, iniziazio eta beste) iraganen dira bainan eguna ez da oraino finkatua. Xehetasunentzat eta izena emaiteko, deitu Pantxika Prat: 06-47-07-64-12 (web: yogapantxika.fr). Nornahik praktikatzen ahal du. Ongi-etorri interesatua den orori.