Sortze

Oihanburian lorietan daude. Joan den otsailaren 20an Maylis Mounho eta Philippe Mongabure andere-jaunek ongietorria egin diote beren lehen haurño eta muttiko erneari. Simon izendatu dute hau. Gure goresmenak aitama uroseri eta zorionak sortu berriari.

37. mus lehiaketaren arrakasta

Aiherrako eskola giristinoak antolatu mus lehiaketak betiko arrakasta dauka, aurtengo edizioak 100 bat pare bildu baititu giro hoberenean. Hau joan den igandean iragan zen, Denen Etxeko gelan. Erran behar da lehiaketa hau ongi antolatua eta urte guziz handizki sariztatua dela, muslariak urrunetik jinaraziz. Arratsalde osoan, bazen matahami, talo eta edari, eta arratsean afaltiar anitz arroltze moleta on baten jateko. Huna emaitzak:

- A mailan, Errecart-Esponda Bastida eta Donazaharrekoak nagusitu zaizko Beloscar-Lartigue makear eta urkoitar pareari. Txapeldunek 700€ eskuratu dituzte, finalistek 250€.

- B mailan, Antton eta Gorka Candele bastidarrak nagusitu zaizkio Sabaloue-Izoco aihertar pareari.

- C mailan, Christian eta Anne-Marie Laborde Salieseko pareak ereman du Sallagoity-Pochelu mehaindar parearen kontra.

Eskolako burasoen elkarteko arduradunek eskertzen dituzte laguntzaile eta jokolari guziak, ahantzi gabe holako egunaren antolatzeko beharrezkoak diren enpresa edo ofiziale babesleak, eta ekitaldi hunen antolakuntza errextu duen Aiherrako Herriko Etxearen gela eta barneko material guzia antolatzaileen esku urririk utzirik.

Mus jokoaz haratago, ekitaldi hunek elkartasun ekarle nahi du izan, bildutako diru guzia Arzac-Arraziguet-eko haurren zirkuko gelaren zati bat finantzatzeko erabiliko baita, proiektu handinahi eta federatzailea, eskola osoak parte hartuko baitu.

Biba antolatzaileak eta heldu den urte artino!

Biharko Aiherra zerrenda: 8 emazte eta 7 gizonekin

Joan den urtarrileko herriko agiantzen ekitaldian, Arño Gastambidek herritarrei jakinarazi zien auzapezgoa utziko zuela bigarren kargualdi hunen hondarrean, eta deia lehen axuanta izana zen Frederic Hernandezekin osatu ekipa berritua abiatuko zela. Azken hunek joan den astean segurtatu du “Biharko Aiherra” listaren zerrendaburu izanen zela, azken 12 urteetan egin lanaren haritik, oroitaraziz azken kargualdian Aiherrak bere garapena segitu duela, Arño Gastambideren inguruan obratu proiektuak zerrendatuz; hala nolaHerriko Etxearen eta Beltzagitearen berritzeak (azken hunek beste berritasunak bultzatu ditu: haurzaindegi bat, osagarri arloko profesionaleri zuzenduak diren bulegoak eta herriko gazte bati alokatu etxebizitza), gehiengo aihertar gazteendako 2 lotizamenduen sortzea, lehengo harrobiaren bermoldaketa, Antzuola herriarekin den hitzarmenaren indartzea (Aiherra-Antzuola 40 urte) bi herriak mendiz juntatzen dituen bidea obratuz, urteetan zehar herriko elkarteak beren proiektuen obratzen lagunduz, eta lan batzorde idekietan herritarrak parte harraraziz besteak beste.

Bozketa berri hunentzat, 8 hautetsik segitzen dute, eta haueri juntatu zaizkie 7 hautagai berri.

Huna zer dioen Frederic Hernandez-ek: “(….) Lista berri hunek elkartuko ditu esperientzia, gazteria eta begirada berriak balore berdinak partekatuz eta helburu hauekin: lurraren menperatzea aihertarrek herrian bizitzeko eta egoiteko ahala ukanez, euskarari merexi duen lekua uztea (euskara gure nortasunaren zutabea), lotura soziala azkartu nahi dugu, elkarte munduari eta herriko komertsanteei sostengua ekarriz…”.

Laborantza arrazoituaren defentsa hartzen du auzapez izaiteko gogoa duen Frederic Hernandez-ek, eta herritarrengandik hurbil izaitea hitzemaiten hauekin komunikazio erregularra segituz. Anbizio handia du talde hunekin proiektu berriak eramateko, finantzen kudeaketa serios eta iraunkorra atxikiz, eta Euskal Elkargoan Aiherraren presentzia mantentzeko aihertarren ahotsa eramateko.

Hitzorduak:

Martxoaren 7 eta 13an, antolatuko dira bilkura publikoak.

Martxoaren 2 eta 14a artean: nahi dutenen ganat hurbiltzeko prest dira. Auzoko kontseilari bati aipatu dudarik gabe edo deitu 06-82-80-10-91 zenbakira.

Martxoaren 15ean, herriko bozak.

Hautagaien izenak: Maider Loyhato Oxarango, Philippe Mongabure, Uxue Elosegi Martinon, Arño Gastambide, Karine Perez, Sabine Dithurbide, Raphaelle Adoglo, Frederic Hernandez, Julie Minjou, Maite Oxarango, Damien Sallato, Hervé Parachou, Ramuntxo Oteiza, Samuel Biscay eta Pantxika Beloscar.