Otsail ostegunak: “Euskal Herriko faunaren berezitasunak”, Iker Elosegirekin

Aurtengo otsail ostegunetako azken mintzaldia, Euskal Herriko faunari dedikatua izanen da. Iker Elosegi naturalistak hainbat urtez metatu jakintza guzia Euskal Herriko faunaren gidaliburuan bildu du. Gaualdi huntan, hain hurbil eta hain arrotz zaigun “ingurumenaz” argituko gaitu pasioz eta gozamenez.

Huna nola Zabalikek aurkezten daukun gau huntako gaia:

“Hegazti, ugaztun, suge, intsektu edo arrainen bioaniztasuna biziki handia da Euskal Herrian. Honen zergatia anitza da: badira arrazoin geografikoak (klima, itsasoa, mendia...), badira arrazoin historikoak (noizbait klima hotzarekin jinak ziren espezie batzu oraindik gure mendi gorenetan bizi dira), eta badira ere bertako jendeek lurralde huntan eta lurralde huntarik bizitzeko asmatu dituzten maneren ondorioak...

Gure inguruetan, biziki hurbil ditugu basapiztiak: gure baratze, erreka, xare, oihan, mendi, baserri eremu edo kostan bertan! Batzu errazak dira ikusteko: nork ez ditu larrazkenean lertxunak lerro lerro ikusi? (beharrik kantu batzuek arrakasta dutela haurrek gauza batzuen ikasteko!). Denek ikusiak ditugu karakoilak, bainan gutik dakite gehien karakoil diren eremuak gisu harria den lekuak direla, nola uste duzue egiten dutela heien kuskua? Beste batzu ez dira kasik sekulan ikusten, bainan gure ahoak heien izenez betetzen dira, hor dira otsoa edo hartza... Liburu honek Euskal Herriko basapiztia espezie batzuen ezaugarriak, heien biologiako gauza nabarmenak eta bereziki bizitzeko zer behar duten ulertzeko gako batzu proposatzen ditu. Gogoeta batzu ere partekatzen dira, egungo gai zonbaiten inguruan. Hola dira aipatzen arrain, apo, suge, okila, zizari, otso, sai, hartza, karakoil, urtxintxa edo pinpirin espezie zonbait, urte guzian hemen bizi direnak edo migrazio denboran soilik agertzen direnak.

Beraz liburu honen helburu nagusia basapiztien inguruko jakin mina piztea da, bizi giren ingurumenaren hobeki ulertzeko gakoak eskainiz. Jendeok ingurumenaren parte gira eta gure orekarako ingurumenarekin dugun harremana garrantzitsua dela pentsatzen badugu, behar gira ohartu ez girela bakarrak eta beste anitz basapiztiarekin partekatzen dugula lurralde hau. Begiak irek, beharriak luzatu, usainak usnatu eta... gozatu!”.

Beraz ez duda, hurbil zaitezte Donapaleura ostegun huntan! Hitzordua, Touzaa etxean emana da (20:30). Ondotik, bixkotx baten jateko eta baso baten edateko parada izanen da otsail ostegunak goxoki bururatzeko.