Herriko Etxeko aldizkaria

Primaderako hauteskundeen ondotik Herriko Etxeak moldatu eta etxetara helarazi du bere lehen aldizkaria “Zuekin aurrera” lemapean. Piero Rouget auzapezaren sar hitzaren ondotik agertzen dira zuzen den bezala kontseiluko hautetsi guzien izenak eta argazkiak, zortzi direla axuantak. Orrialdetan barna ikus daiteke Bizkondeen borobilgunean Hartzarori buruz egina izan den horma irudia; izan diren estreinaldien berri: Arruntzaren berrantolaketarena (berriki aipatua hemen), RCUJren erakusleiho berria, Hiribeheren auzo konpostagailuarena Xandienea aparkalekuan. Besta eta animazioak aipatu dira: herriko bestak (gainean ditugunak) eta erran gabe doa Kapito Harri pilota elkartearen mendemuga (oraidanik hasirik irail erdi arte). Herriko Etxearen egitarauetan agertzen dira: 2026ko aurrekontu funtsezkoa zenbakitan, Errepiragaraiaren egoera, gazte kontseiluaren ziklo berria eta mediateka berria, obrak aitzinatzen ari direla. Zuzen den bezala orrialde bat emana da oposizioko hautetsieri beren ikusmolde eta kezkak plazaratzeko. Oro har aldizkari argia da, irakur errexa, argazki askorekin eta dagokion bezala bi hizkuntzetan idatzia. Agian uztariztar guzieri gustatuko zaiote.

Buru berri Uztaritzen

Uztaritzeko jendarmerian burua aldatuko ote da? Girondatik, St Andre de Cubzac hiria utzirik etorriko zaigu jendarma berri bat. Landesetan sortua, 47 urterekin, aita familiako da Guillaume Huguet. Berriki kapitain gradura altxaturik hemengo zerbitzua hartuko du agorrilaren lehenean. Agian ongi etorri hoberena ukanen du uztariztarren ganik.