Joan den larunbatean 3.000ko bat euskaltzale Baionara hurbilduak ziren, euskara biziarazten duten elkarteentzat baliabide gehiago eskatzeko eta aldarrikatzeko.

Manifestazioa abiatzean txalotuak izan dira Bordele-Baiona bizikletaz egin duten ikasleak, azterketak euskaraz pasatzeko galdea dela eta, zenbait egunez ibilbidea egina zuten larunbatean heltzeko.

Manifestazioaren bururatzeko hitzaldian, ikasleek brebeta euskaraz pasatzen ahal badute, garaipena partziala dela errana izan da, baxoarena oraino lortzekoa baita. "Brebeta euskaraz lortzeko bidea luzea izan da, ez duda baxoarena ere lortuko dugu mobilizatzen segituz, gaur bezala".

Bestalde euskararen transmisioa eta erabilera egunerokoan segurtatzen dituzten elkarteak sustengatzeko deia egina izan da. "Izan erakaskuntzan, helduen alfabetatzean, hedabideetan, aisialdietan edo lehen haurtzaroan, urtez urte gero eta gehiago egitea eskatzen zaie, baliabideak hein berean gelditzen direlarik. Ezin da hola segitu. Nola zabaldu eta garatu euskara arlo horietan behar heinean ez bada inbertitzen?" galdera pausatua zela. Euskararen biziberritzerako ezinbestekoak diren euskalgintzako elkarteek baliabide duinak eta egokiak behar dituzte, beren aktibitatea garatzen segi dezaten.

Euskalgintzarentzat: "Egun karrikan bildu gaituzten bi aldarrikapen horietatik haratago, hizkuntza politika publiko osoa da jokoan dena. Zer etorkizun euskararentzat hizkuntza ikasi, erabili eta transmititu nahi duteneri bidea ez bazaie errexten?"

Azken inkesta soziolinguistikoaren emaitzak gogoratuak izan dira: "belaunaldi gazteenetan euskara emeki berreskuratzen ari dela berretsi bada, erakusten du euskaldunak gero eta zokoratuagoak girela, erabilera beheititzen eta hizkuntza maila apaltzen ari dela. Murgiltze eredua ikastetxe guzietara hedatuz, euskara transmititzeko gai izanen diren hiztun osoak sortzeko garaia da". Datuak kezkagarriak izanik ere, euskararen gainbehera ez dela saihestezina, horretarako baitezpadakoa da hizkuntza politika berria oraindanik eraikitzea, orain artekoa ez baita gehiago egungo erronkeri erantzuteko egokia. Euskal Konfederazioko eragileak prest dira kontzertaziorako, Hitzarmen berri baterako lanetan parte hartzeko. Baitezpadakoa da lurralde hizkuntzen lege koadroa hobetzea, euskarak estatutu berria lortzea, Ipar Euskal Herriaren eraikitze instituzionalean urrunago joateko lege egutegiak eskain ditzakeen aukera guziak jorratuz.

"Herri mugimenduak lanean segituko du eta garaia da arduradun politikoek pasibotasunetik atera, beren erantzukizunak hartu eta aktiboki parte har dezaten Ipar Euskal Herria berreuskalduntzen laguntzeko" mezuarekin hitzaldia bururatu da.