Berriz ere gertakari bat ezinago hitsa! Reims hiriko ospitalean, gizon bat, arrazoinik batere gabe barnez-barne ibilki zena, bat-batean puñal ukaldika mendekatu zaizkio bi emazteri, bat 37 urteko erizaina, bestea idazkari lanetan ari han berean. Biharamunean, erizaina, bi haurren ama, pausatu da hartu kolpe bortitzen ondorioz. Berriak harritu ditu bazter guziak, bai artategi hartan bixtan da, bai eta erraiten ahal da Frantzia guzian!

Gaixtagina laster arrastatua izan da. 59 urteko gizona, burutik ez batere untsa, diotenaz. Duela sei urte jadanik molde bertsuan mendekatua zena lau laguni. Bera arizan da erraiten erizainak ezagutzen dituela beren soinekoetarik eta batto ikusi orduko geldirik ezin egonak hartzen duela! Zonbait urtez artatua izana zen, iduriz hobekitua, horra nun berriz lerratu den beraz holako gauza izigarri baten egitera!

Bideko errekontru bat, zinez ikaragarria, gertatu da Frantzia iparraldeko Roubaix hirian. Kontrako bidetik aise zalutasun handiegian heldu zen auto batek jo du polizia bat. Bigarren auto huntan baziren lau lagun, hiru poliziakide, bi gizon eta emazte bat, hiruak hogoita-zonbait urtekoak, eta neska gazte bat, ospitalera segitzen ari zutena. Poliziako hiruak han berean gorputz gelditu dira. Bigarren autoan bi lagun. Laster jakin da autozaina, bera ere arrunt gaztea, mozkorra zela eta drogatua, ez baita beraz harritzeko holako istripua gertatu bada ere! Laster eman du bere azken hatsa! Gertakari latz horrek bazter guziak sesitu ditu, ondo hartan segur bai eta Frantzia guzian gaindi. Denak utzirik, Emmanuel Macron lehendakaria izan da Roubaix hirian. Mintzatu da hango polizan direnekin bai eta bizia funts hortan galdu dutenen familiekin, deneri sokorri poxi bat nolazpait ekarri nahiz. Azpimarratu du bixi-bixia gero eta larderia gehiago beharko dela agertu, sobera...

Bat-batean berriz ere azkarki aipu da Marine Le Pen eskuinburuko politikariak duela bederatzi urte egin zuen diru mailegu berezia. Bederatzi miliar euro ardietsi zituen alabainan errusiar banku batenganik, bazuela holako baten beharra Frantziako hauteskundeak gogoan. Berriz aipu da hori hoinbeste denboraren buruan, zeren-eta frantses legebiltzarreko batzorde batek gisa hortako ikerketa akuilatzen ari baitu. Joan den egunean preseski berak behar ukan du agertu batzorde horren bilkura batetara. Berriz erran du haste-hastetik errana zuena, ezinbestean zuela errusiar banku bati hoinbeste sos galdetu, Frantziako banku bihi batek ez zaiona eman nahi. Jakinarazi du bestalde delako bankua ez dela arrunt errusiarra, partaide zonbait txekiarrak izanki. Gainerat holako banku batekin harremanak ukaitea ez dela bekatu, ez dela batere Putin diktadore fama daukan aitzindariarekin tratuan arizan balitz bezala. Ikusi behar nolako segida ukanen duen...