Sortze

Joan den maiatzaren 11n sortu zen Marius Jamet. Hunen burasoak dira Morgane Lefel eta Guillaume Jamet andere jaunak, Londaitzeko bidean, Harria etxean bizi direnak. Goresmenak burasoeri eta bizi luze bat sortu berriari.

Gazteen etxe kurrida eta herriko bestak

Herriko bestak hurbiltzen hasiak zauzkigu, ekainaren 15etik ekainaren 19a arte iraganen direnak, hots 2 asteren buruan. Karia hortara besta komiteko gazteak, etxez-etxe badabiltza aurtengo besteen egitaraua herritarrei aurkezten eta laguntza eske. Ongi errezibituak izan daitezela!

Usaian ez bezala, herriko besten programari egun bat gehitu diote, aurtengo herriko bestak ostegunarekin herriko gazteek antzerkia eskainiz hasiko baitira. Egitarauaren berri emanen dauzuegu heldu den astean!

Ibaien astea

"Ibaien astearen" kari, Aturri behereko Itsas sindikatu anitzak, "Jungle canoe" batasunarekin elkarlanean, goiz bat antolatzen du uretako inguruen eta erreka bazterren babesari buruz jendeak sentsibilizatzeko. Animazio hau ekainaren 3ko goizean iraganen da, heldu den larunbatean. Animazio hunen xedea da kanoan ibiliz hondakinak biltzea eta uretako inguruneak ezagutzea. Haran ibaian hiru ibilbide proposatuko dira. Hitzordua, larunbat goizean (9:00), Bastidako portuan, igerilekuaren ondoan.

Hauteskundeak: Antzuolan EH BILDU lehen

Lau urtetatik gertatzen diren herriko bozak joan den igandean iragan ziren Euskal Herri Hegoaldean, batez ere Antzuolan. Azken aldian bezala EH BILDU zerrenda lehen atera da 594 bozekin (7 hautetsi), bigarren PNV 350 bozekin (4 hautetsi) eta hirugarren PSOE 68 bozekin (0 hautetsi). Abstentzioa %33,33koa izan da. Herriko kontseilua ekainaren 17an bilduko da, auzapezaren hautatzeko. Orain arteko auzapeza Beñardo Kortabarria (EHBILDU) ez da berriz aurkeztu. EH BILDUren zerrendaburua Olatz Lezeta Urzelai anderea izanez, manera guzien arabera hau da biharko Antzuolako auzapeza izanen.