Hegoaldean | 2023ko Ekainaren 01a
Udal eta foru hauteskundeak
M.V.
Maiatzaren 28ko udal hauteskunde edo herriko bozetan, EAJ izan da alderdi bozkatuena Bilbon eta Donostian. EH Bilduk irabazi du Gasteizen, eta UPNk Iruñean. Batzar Nagusietan, EAJ gibelatu da boz kopuruan eta boterea galdu du erakunde guzietan. Koalizio abertzaleak, aldiz, emendatze handia ezagutu du lurralde guzietan, bozkatuena izan da Arabako hiriburuan eta Gipuzkoako Batzar Nagusietan.
Donostian, EAJk eta EH Bilduk zinegotzi kopuru bera erdietsi dute (8), baina jeltzaleek puntu batez irabazi dute bozei dagokienez. Bilbon alderdi jeltzalea aise nagusitu da. Haatik, bi ordezkari galdu ditu eta gehiengo osotik urrundu da. Gasteizen EH Bildu atera da lehen, 7 zinegotzirekin, EAJ laugarren lekura jaitsi da. Iruñean UPN nagusitu da, 9 ordezkarirekin, eta EH Bilduk 8 kontseilari lortu ditu.
Batzar Nagusiak: Gipuzkoan, EH Bilduk 22 ordezkari lortu ditu (5 gehiago) eta EAJk 17 (3 gutiago). Bizkaian alderdi jeltzaleak garaipen zabala ukan du, 23 eserlekurekin. EH Bilduk 15 batzarkide erdietsi ditu (5 gehiago). Araban, EAJk 15 batzarkide eskuratu ditu eta EH Bilduk 14.
Nafarroako parlamentuan, UPNk irabazi du, 15 eserlekurekin, baina Maria Chivite hautagai sozialistak orain arteko 11 ordezkariak atxiki ditu. EH Bildu Geroa Bairen aitzinera pasatu da, hirugarren indar gisa.
