Ekainaren 28, 29 eta 30ean lehen aldiz Arberatzen, EHZ festibala iraganen da, Hemendik lelopean. Aña Iriart, festibaleko laguntzaile amikuztarrarekin bildu gira, edizio hunen berri eman dauku.

EHZ festibala urtez urte… bidez bide

EHZ festibalaren 28. edizioa Arberatze-Zilhekoan antolatua bada, 1996an lehen aldiz Arrosan muntatu zen. Garai horietan Ipar Euskal Herrian festibalaren ohitura handirik ez zen. “Piztu” elkarteak zuen egitasmoa abiatu, kostaldeko eta barnealdeko herritarrek, bereziki gazteek elkar truka dezaten. Lehen urtetik arrakasta handia bildu zuen, ehunka laguntzailerekin eta ikusliarrekin. Azken edizioa 2003an Arrosan antolatu eta, ondoko urteetan Idauze-Mendin (2004-2008), Heletan (2009-2012), Lekornen (2013-2017) iragan zen. 2018. urtea trantsizio urtea izan zen, Euskal Herria Zuzenean elkarteak gogoeta fasea ideki zuen, proiektua berrasmatzearen beharrarekin. Urte horretan festibal ibiltaria antolatzea erabaki zen, “EHZ nomada” deitu zena. Baigorrin, Baionan eta Itsasun egitarau desberdinak iragan ziren.

EHZren formatu berriaren inguruan gogoetak eramanak izan ziren eta Irisarrin festibala muntatzea erabaki zen. Festibalak beste formatua hartu zuen, herri barnean eta ohidurako pentzean ikusgarri eta kontzertuak antolatu ziren. Bost urtez Baxe Nafarroako herrian antolatua izan da (2019-2023), 2020an izurritearengatik ez zen iragan.

Festibalaren filosofia

Sortu zenetik, festibaleko laguntzaileek, diru publikoaz antolatuak diren festibal handien alternatiba izaitea nahi ukan dute. Kolektiboki sortu eta antolatu gertakariak, kalitatezko kontzertuak proposatzen ditu, nazioartean ezagutu taldeak eta tokikoak festibalera ekarraraziz. Urtez urte sartzea prezio merkean proposatua izanez, publiko zabala hunkitzen du. Aña Iriart-ek zioen EHZko belaunaldi berriak bide beretik segitzen duela, hastapeneko xedeak atxikiz.

Azpimarratzen zuen elkarteak bere burua horrela definitzen duela: “Elkartearen izaera hainbat kontzepturen bidez defini dezakegu: feminismoa, antikapitalismoa, ekologia, justizia soziala, internazionalismoa, aniztasun kulturala eta bazterkerien aurkakoa”.

Amikuzeko lurraldean kokatzea

Euskal Herria Zuzenean elkarteak, urteko biltzar nagusian, erabaki du tokiz aldatzea. Amikuzeko hautua egin da. Aña Iriart-ek zioen, erabakia hartu eta, toki baten xerkatzen hasi zirela, amikuztar Herriko Etxe batzuekin harremanetan jarri ziren. Arberatzeko Herriko Etxearekin adosturik, 2024ko edizioa, hurrengo asteburuan, lehen aldiz Amikuze eskualdean iraganen da. Urtean zehar arberaztarrekin lan bat eramana izan da, elkarteko komisio desberdinak (komunikazioa, teknika, administrazio kudeaketa eta proiektu segipena) lanean hasi dira.

Aña Iriart Mithiriñako gaztea kontent agertu da, festibala Amikuzeko lurraldean antolatua izanen delakoz. Anitz urtez Amikuzek irudi negatiboa zuela zioen: “Usu entzuten dugu Amikuzen deus ez dela, bazterrak ez direla laketak. Festibala Arberatzen izanez, eskualdearen ezagutzeko parada ezin ona da”. Gehitzen zuen azken urte hauetan Amikuzen elkarte anitzek lan handia eramaiten dutela: Zabalik, Amikuzeko Irratia, Gaztetxea… bezalako egiturak izendatzen zituela. Urtean zehar eramaiten duten lan gaitza azpimarratzen zuen.

Kontzertua eta gogoeta uztartu

Aurten ere EHZko gazteek programazio aberatsa proposatzen dute, hiru egunez kontzertu eta ikusgarri desberdinak ikusgai dira, eztabaidak ere izanen dira, musika eta gogoetak uztartuz. Egitarau zehatza ezagutzeko ehz.eus webgunean sartu. Gune horretatik hiru eguneko txartelak ere eros daitezke. Laguntzaile beharretan dira, leku aldaketak nahi ala ez lan gehigarria galdegiten baitu, horretarako muntaketan ere jendea beharrezkoa da. Aña Iriart-ek zioen: “Edozein adineko pertsona ongietorria da!”. Muntaketa ekainaren 19an hasiko da.

Horra EHZk lehen aldiz Amikuzen antolatzen duen ekitaldirako gomita zabaldu du, “EHZ proiektu kolektiboa eta herrikoia da, herritik eta herriarentzat egina.EHZ ez da kontsumitzen, baina bai parte hartzen den festibala da!”.