Hauteskundeen emaitzak

Uztaritzerentzat hauek izan dira: izen emanak: 5.834 hautesle, bozkatzaile 2.987, balio zutenak 2.886. Bardella 743 boz (%25,74), Glucksmann 511 boz (%17,70), Hayer 394 boz (%13,65), Lassalle 262 boz (%9,08), Toussaint 214 boz (%7,41), Aubry 162 boz (%5,6), Bellamy 134 boz (%4,6), Maréchal 132 boz (%4,57). Besteak oro gibelago gelditu dira.

Uztaritzen kermeza

Uztaritzeko kermeza heldu den igandean 23an iraganen da. Egitarauan da: meza nagusia (11:00), aurten “Labourdins” elkarteko soinulari gazteekin. Ondotik Jondoni Bixintxo eskolako aterbean zintzur bustitzea eta bazkaria. Bazkari kontu hauta izanen da, bazkari osoa 25 eurotan edo nahi duenarentzat platera bakarrekoa prezio desberdinetan. Bazkal ondoan jokoak haurrentzat. Ongi etorri hoberena segurtatua da.

Musikas elkartearen biltzar nagusia

Musikas elkartearen biltzar nagusia zen asteazkenean Arruntzako Anttonieneberria bere egoitzan, 20 bat lagunekin. Bost urte badu, alokatuz, Herriko Etxearena den egoitzan direla. Kezka bat agertu da hortaz, bainan Christian Ibarboure axuantak justifikatu du alokatze hori herriak, etxearen berritzeko herriak sartu diru zamarekin. Lehendakariaren agurraren ondotik zuzendariak zehaztu ditu 2022-2023ko jarduerak. Urtea horientzat, doa irailetik ondoko irailera. Elkartea bost azpiegiturez osatua da: Soinu Ttiki (Ezpeleta), Biez Bat (Basusarri), Musikarentzat (Kanbo), Klika (Larresoro) eta Musikas, elkarteak 27 langile ditu, gehienak musika irakasleak. Bost musika tresna dira gehienbat irakatsiak: pianoa, gitarra, bateria, trikitia eta panderoa. Kantu eskola ere bada, bainan gazte gutirekin, ezbide dute sail hori hartzen. Publikotik beste jarduera batzuen beharra agertu da: txistu, gaita, antzerki eta dantza. Ikasleak gehienak Errobi aldekoak dira, bainan ere Ahurti eta Landesetatik heldu direnak, 12 urtez goragokoak, kopuru handian emazteak dira (%60). Diru kontuak agertzean ikusi da oso txarrak direla, 2022an zilo bat eginik (39.000 euro), are handiagoa izanen baita oraikoan (79.072 euro). Kontuen komisarioak xuxenak zirela baieztatu baditu ere, garbiki erran du ezin dutela bide hortarik segitu, elkartearen geroa zalantzan emanez. Ondorioz debate luzea sortu da norabideak berrikusteko: zonbait tresna gutiago irakatsi, irakaskuntza kolektiboak sustatu, animazio gehiago egin, gastuak ttipitu, prezioak emendatu edo diru laguntza nasaiagoak galdegin. Aurtengo aitzinkontuetan denak laguntzeko nahikaria agertu bada ere zaila izanen zaie helburu hortara heltzea. Geroak erranen. Jardueren eta diru kontuen txostenak onartu dira zonbait abstentziorekin. Bukaeran azpiegituren ordezkarien izendatzea egin da. Elkartearen bulegoa honela da: lehendakari Ramuntxo Olhagaray, diruzain Jean-Marc Benesse, idazkari Jocelyne Barre eta zuzendari Sarah Bonnet.

San Mixel auzo batzordearen biltzarra

Joan den ortziralean Landagoieneko gelan iragan da, 15 kiderekin. Azaroko biltzeaz geroztik oinezko bidexka baten egitea jendarmeria eta Super U saltegiaren artean onartua izan da. Landagoien eta Mokopetakoborda bidearen artean bidexka baten moldatzea ere galdegina da. Departamenduko bi bide nagusiren artean kokatua den auzo horrek kezkak betikoak ditu, bereziki Doreako eta San Mixel bideekin, hauek hertsiak baitira, lanjerosak, espaloi egiteko tokiak eskas, gero eta gehiago autok hartzen dituztelako, itzuli luzeago batzu ez egin nahiz. Galdegiten dute sentsu bakarrean emaitea, bai eta ere artean tinduz deseinu batzu eginak izan daitezen zehazki bide horietan, oroitarazteko hor oinezkoek dutela lehentasuna, autoen abiadurak mugatzeko oreneko 20ra. Salatzen dute handizki abiadura horiek ez direla errespetatuak. Zonbaiten iritziz su gorriak beharrezkoak lirateke. Entzunak izanen ote dira? Beste gaietan aipatu da 932 bideko autobus geltokietan aterbe baten beharra, auzokideen arteko bazkari baten berrantolaketa Haitzekobordan Covidaz geroztik egin ez dena. Hurrengo biltzarra irailaren 13an finkatu dute.

Dantzaldi

Ur Begi elkarteak antolatzen du ekainaren 29an larunbat arratsaldearekin dantzaldi handi bat Heraitzeko plazan (19:30), Patxi eta Konpainiarekin. Euskal dantzak dira gehienbat emanak izanen. Egun hortan Ur Begik segurtatuko ditu jan edariak, kide bat baitu hortarako moldatua. Euria balitz egun hortan dantzaldia Kiroletan eginen da, Heraitzeko aterbea hauteskundetako hartua izanen baita. Ongi etorri deneri.