Asteburu huntan, irailaren 21 eta 22an, Lazken Abentura elkarteak lehen aldikotz Euskal Herrian antolatzen du Lazken trail deitu lasterkaldi berezia Ortzaizen, Ahaizemendi gainean Antzaramendi eta Larramendi kaskoetan. Lehen abiatzea, ibiakoitzean goizeko 6 orenetan, eginen da Antzaramendi gaineko urtegiaren ondotik. Lasterkariek behar dute egin 6,5 kilometroko joan-jina oren batez petik bertzenaz kanporatuak dira. Barne gelditzen direnek ondoko orenean eginen dute berriz abiatzea eta hola izanen da oren guziez azken bat gelditu arte eta hura izanen da irabazduna. Antolatzaileek berek ez dakite noiz bururatuko den lasterkaldia, zeren izena emana duten zonbait lasterkarik badute lasterkaldi luzeen egiteko usaia, hala nola Pantxo Saint-Martin, Paxkal Delannoy eta David Nesprias gizonetan edo Séverine Duhalde emazteetan. Lasterkariek eta heien sustengatzerat etorriko direnek jateko eta edateko aurkituko dute Antzaramendi gainean, zikiroa ogitartekoetan eta taloak eta hori larunbat eta igandean. Lasterkaldi gunerat ezin da beribiletan etorri, aparkalekuak aski urrun dira eta oinez beharko da hurbildu.