Plazako Errotak ateak zabalik

Aste hondar huntan, larunbat eta igandean, ekainaren 22 eta 23an, Joanes Etcheverry, Akerreta plazako errotaren jabeak, gomitatzen gaitu bere altxorraren bisitatzera. “Ondarea eta Erroten Egunen” 26. edizioa daukagu, nahiz gutarik anitzek ezagutzen dugun errota, gauza berriak deskubritzeko aukera emana zauku. Adibidez, aurkituko dugu zuzenean arto-gorri edo ogi bihien irintzea bi eihera harrien bitartez, Joanes loriatuko da bisita eginaraztea, mila argibide ekarriz. Berak seinalatu bezala“etorri lasai”, izanen da talo, bixkotx, sagarno, garagardo eta beste, ongi gozatzeko.

Bestetako erreserbak(bis):

Herriko bestetako usaiako bazkari-afariendako izenak eman behar dira, hauetan ostiral eguerdiko adinekoen bazkaria eta arratseko zikiroa, baita igande eguerdiko senpertarren bazkaria “paella”. Izen emaiteak iraganen dira, ostiralez 14 eta 21ean (18:00-20:00), larunbatez 15 eta 22an (10:00-12:00) Denen Etxean edo deituz 06-50-98-85-20.

J.O. Senpere 2024 Mediatekan

J.O. delakoek “Jeux Originaux” erran nahi dute, Larrungo 7 mediatekek osatzen duten sarean antolatuak dira joko berezi horiek, bata bestea baino bitxiagoak, liburu munduari lotuak eta Olinpiar Jokoetako hiztegitik inspiratuta. Nola iragarriak diren ekainaren 26tik uztailaren 11 artean, programa osoa eskura daiteke, mediatheque@senpere64.fr gunean edo deituz 05-59-54-10-19. Ohartzekoa halere, asteazkenean ekainaren 26an (10:00),“Arrivée de la Flamme Omédiathétique”, ondotik proben azalpena eta abiadura, diziplina guzietako entseguekin. Mediatekako kide guzieri idekia baita karta ez dutenei ere, mailak adinen arabera, denek ulertu dugu umore anitzeko jokoak direla.

Mintzaldia euskaraz mediatekan

Lapurdi 1609 elkarteak antolatzen du mediatekaren lankidetzarekin, ekainaren 27an (18:30). Auxtin Zamoraren azken liburuaren inguruan izanen da hitzaldia“Senpereko etxe gehienen lur gaineko datu, helbide eta izenen bilduma”, jarraian elebidunezko proiekzioa ere. Solasaldiak segitu behar luke ondotik Herriko Etxeak eskainitako janari mahai baten inguruan.

Maiatzeko sortze eta heriotzak

Seinalatu sortzeendako lehen hiruak apirilekoak dira: Hacala Oxan, Nemery Ekhi eta Maddi (biritxiak) eta Sanchez June, zorionak burasoeri.

Heriotzak: Iturria Fernand 91 urte, Bareigts Marie Madeleine sortzez Etcheveste 80 urte eta Auzas Viviane sortzez Molas 84 urte. Dolumin bizienak hauen familia eta adiskideeri.

Errugbian final handia

Artetan, ametsak errealitate bilakatzen dira, igande huntan, ekainaren 23an gure errugbilariek, jokatuko dute Frantziako finala R2 mailan, Millas-eko katalanen kontra. Horretarako, jaun eta jabe agertu dira St Jean d’Angelyko ekipoaren kontra, 30/7 nagusituz, St Medard-eko zelaian. Lehen zatian abantaila ederra lortua zuten 30/0, bigarrenean aldiz parekatuago izan da. Iduriz Millas-eko taldea, frango gotorra litzateke, ez pentsa halere gure puttikoak beldurrak hartuak izanen direla, holako oparia hutsezina baita. Laugarren titulua eskuetatik hain hurbil izanki, hiruzpalau autobus iragarriak dira sostengatzaileendako, berriz ere aupa Senpere!