Sortze

Ekainaren 5ean, Lohietako Laura Zaldainek eta Eñaut Nobliak ongi-etorria egin diote Haritz semeari. Goresmen eta zorion!

Natura zaindari bat

Herriko Etxeak natura-zaindari bat bilatzen du uda huntako, Baztango errekako jendeen harat-hunatak kudeatzeko. Dakizuen bezala, jende frango ibilki da Baztango errekan gaindi, bazterrak ez beti errespetatuz eta kalte ekarriz tokiko urari, landareeri, abereeri bai eta inguruko etxe eta jendeeri.Azken bi urteetan bezala, xoko hori zainduko duen norbait enplegatu nahi du herriak uztailean eta agorrilean (bi hilabeteko kontratu mugatua, 35 oren astean, asteburuak barne). Interesatua dena harremanetan jar dadila Herriko Etxearekin (mairie.bidarray@gmail.com).

Mendikleta

Heldu den igandean, ekainaren 23an, iraganen da ohiko Mendikleta, Ortzaizeko ikastolak antolaturik. Mendiko bizikletaz hiru ibilaldi (22km, 30km eta 53km) eta oinezkoentzat bi ibilaldi (8km eta 15km). Abiatzeak goizeko 7:30etatik goiti gure herriko plazatik. Eguerditan jateko eta edateko manerak nornahirentzat Artetxea gelan.

Mama Avelina Rogel

Ekainaren 29an, larunbat goizez (10:00), Ekuadorreko Mama Avelina Rogel anderea gutartean ukanen dugu bere herrialdeko bizimoldeaz, kulturaz eta sinesteez mintzatzeko, herriko gelan. Medikua da, naturari eta landareeri bereziki arta handia ekartzen dietena, bai eta jendeeri. Buru-beharri engaiatua da bere lurraldeko ohidura zaharrak bizirik atxiki nahiz. Itzuli bat egiten ari da Euskal Herrian barna, eta mintzaldiak eskainiko ditu Lehuntzan, Bidarrain, Oragarren eta Urketan. Gure herriko hitzorduarentzat, parte hartu nahi duenak bere izena eman behar dio Lixeroneko Xiril Alvarezi (x.alvarez@hotmail.fr). Parte hartze saria, bakotxaren borondatearen araberakoa.

Berriz ere bozak

Ekainaren 9ko europar deputatuen hauteskundeek, dakizuen bezala, agerian ezarri dute eskuin-muturraren gorakada handia. Gure herrian ere eskuin-muturra lehen atera da. Bozkaldi horren biharamunean berean Emmanuel Macron presidenteak frantses legebiltzarra desegin du. Ondorioz, deputatu bozak iraganen dira ekainaren 30ean eta uztailaren 7an.