Uztailaren 18an, Euskal Elkargoak eta frantses estatuak “Etxebizitzentzat engaiatu lurraldeak” deitu kontratua izenpetu zuten. Hitzarmen hunek, Ipar Euskal Herriko 3.500 etxebizitzen eraikitzea azkartzea ahalbidetuko luke, horietan 2.091 etxebizitza sozial.

Ipar Euskal Herria saridunen zerrendan

Otsailaren 14an, Gabriel Attal lehen ministroak, Ipar Euskal Herria “Etxebizitzentzat engaiatu lurraldeak” programako 22 saridunen zerrendan zela jakinarazi zuen, hautagaiak 63 zirelarik.

Uztailaren 18an Euskal Elkargoaren egoitzan, Jean-René Etchegaray Euskal Elkargoko presidenteak eta Julien Charles Pirinio Atlantikoetako prefetak “Etxebizitzentzat engaiatu lurraldeak” kontratua izenpetu zuten. Izenpetze horretan presente ziren: Roland Hirigoyen, Habitat-ko, etxebizitzako, hiriaren politikaren presidenteordea baita Habitat Sud Atlantic-eko presidentea ere dena, Claude Olive OFFICE 64 de l’Habitat-ko presidentea, Cécile Elissalde Col-eko presidentea, Xavier Camblong Domofrance-ko lurraldeko zuzendaria eta Maider Arosteguy Miarritzeko auzapeza baita obralaria. Horrez gain, 11 herritako auzapezak ere presente ziren: Angelukoa, Azkainekoa, Baionakoa, Miarritzekoa, Bidartekoa, Hendaiako, Mugerrekoa, Donibane Lohizunekoa, Senperekoa, Urruñakoa eta Bokalekoa.

Frantses estatuak 8 milioi euroko laguntza

Alokatzaile sozialentzat, programa hunek 24 milioi euro inguru kostako duela estimatzen du Euskal Elkargoak, eta 9 milioi euro baino pixka bat gehiago ekintza horri lotu ekipamendu publikoarentzat. Jean-René Etchegarayk azpimarratu nahi ukan du diru laguntza eskubide orokorrez gain, frantses estatuaren 8 milioi euroko diru laguntza hori ohiz kanpokoa zela.

Programa hunen abantailetako bat prozeduren sinplifikazioa da. Horri esker, obrak aurtendanik edo 2025ean abiaraztea ahalbidetuko luke, baldin eta eraikitzeko baimena eskuratua bada.

Eraikiko diren 3.500 etxebizitza horietan, %61a etxebizitza sozialak izanen lirateke. Ikasleentzat 200 bizitegi baino gehiago izanen lirateke, eta 463 bizitegi biziki sozialak, zinez prekarietatean direnentzat.

Proiektuek, hiriko eta ingurumeneko kalitatearen eskakizunak errespetatuko dituzte, enplegu edota irakaskuntza guneen ondoan diren bizitegiak lokalizatuko dituzte, ateratze prezioak kudeatuko dituzte eta mistotasun publikoa segurtatuko.