“Euskara goxoki ikasi eta bizi”

Amikuzeko eta Oztibarreko gau eskolako ordezkariek prentsa gomitatu dute agorrilaren 30ean, ostiralez, beren sartzearen berri emaiteko. Joan den ikasturtean, 95 ikasle, 12 taldetan banaturik bildu dira 8 irakasleren laguntzarekin euskara ikasteko. Aurtengo leloa “Euskara goxoki ikasi eta bizi” izanen da. Irailaren 30etik ekain bukaera arte, 32 astez, helduei euskara kurtsoak segurtatuko dira, maila guzietan, iniziaziotik alfabetatzeraino, egunaz edo gauaz astean 5 edo 6 ordu emanez. Informazioak hartzeko edo izena emateko, permanentziak antolatuak izanen dira Donapaleun (Gambetta karrika, 36.) irailaren 9tik 18ra (13:00-19:15). Permanentzia horietan, interesatuak diren guzieri behar diren xehetasunak emanak izanen dira. Prezioen aldetik, ikasleak, elkartearen parte izanez, 40€ko kide karta pagatu beharko du. Gainera ikasturtea ordaintzeko, CPF (compte personnel de formation) erabiltzen ahalko da A2 mailatik goiti. Bestentzat kide prezioa aplikatua izanen zaie.Kontaktua: amikuze@aek.eus, 05-59-65-89-21. Kurtsoez gain, gau eskolak urtean zehar animazio batzuk proposatzen ditu, ikasleek elkar ezagutza egin dezaten eta euskara erabil dezaten. Bestalde, jaz, Korrikaren karietara egindako animazioez gain, ikasle talde batek ateraldiak proposatu zituen kurtsoetatik kanpo, euskararen praktikatzeko eta euskal kulturaren ezagutzeko. Aurten ere talde hori berriz martxan ezartzea proposatua izanen zaie ikasleei. Izena emaiteko permanentzia egunetara hurbildu behar da (telefonoz ez da izenik hartzen). Beraz euskara ikasteko, eman izena!

Christine Hassid project dantza ikuskizuna Donapaleun

“Le temps d'aimer la danse” festibala kari, Christine Hassid project CHoPIN dantza ikusgarria eskainia izanen da Donapaleuko zinema gelan irailaren 8an, igandez (15:30).

Jekaterinburgeko errusiar konpaniak gomitaturik, Christine Hassid-ek, Frederic Chopinen inguruko pieza sortuz eta burutuz, bere burua ezagutarazi zuen koreografoen munduan. Golden Mask Award-etan izendatua izan zen bi aldiz. Munduaren lasterraldi burrunbatsuak harrapaturik, bere familiako istorio propioari oihartzun egiten dion pieza hau gaur egun berriz hartzea erabaki du. Hunen ikusteko parada emana da igande huntan Donapaleun. Sartzea 20€.

Elkarteen topaketa Donapaleun joan den ibiakoitzean

Aurten ere, Donapaleuko Herriko Etxeak gomitaturik, Amikuzeko berrogei bat elkarte bildu dira merkatu estalian joan den ibiakoitz goizean. Bakoitzak bere aktibitate eta proiektuen ezagutarazteko parada ukan du. Kirol saileko elkarteek leku handia hartzen bazuten, sozial mailan lan egiten duten elkarteak ere hor ziren baita kultur sailekoak. Memento berezia eta interesgarria elkar ezagutzeko eta gizartean dohainik ari direnen lana preziatzeko.