Merkatu hori Izturitzeko etxalde batean abiatu zen duela 3 urte, hor hitzartzen ziren lekuko baratzezaina, tokiko gariarekin ari zen ogi egilea eta ardi esne jogurta biologikoak egiten hasi zirenak.

Epe laburrean, Izturitzeko karrikarat hurbiltzeko urratsa egin zuten Artetxea elkartearen barrioan merkatua jartzeko, bide handiaren bazterrean, denen bistan. Negurako aterbea ere badute hor berean.

Arberoa ibarreko beste laborari eta tokiko esku-langile batzu juntatu zaizkie geroztik, etxeko ekoizpen fresko andana batekin heldu direnak ostiral arrats guziz (18:00-19:30).

Hor aurkitzen diren: ogiak, barazkiak, ardi gasna eta jogurtak, behi gasna eta esnekiak, eztia, oilaskoa, garagarnoa, sagarnoa, sagar jusa, ahuntz gasna, xerrikia, bixkotx ttipi eta beste, ekoizpen arrunt freskok dira, Arberoan 6 kilometro barneko eremuan ekoiztuak direnak. Etxalde gehienak biologikoan engaiatuak dira.

Merkatuak 3 urte ospatzen ditu ekainaren 5ean, ostiralez.

Izturitzeko merkatuko laborari taldeak 3. urte muga ospatu nahi du salmenta zuzena egiten duten laborari eta laguneri gomita luzatuz, orotarat 15 mahain beharrak dira.

Saskia hartuta, sasoineko ekoizpen freskoak erosiz, zozketa txartelak eskuraturik, merkatuko ekoizpenetarik irabazten ahalko dira.

Animazio aldetik: Basko Folies Band Txaranga, Amikuzeko bestak alaitzean elgar ezagutu duten aspaldiko lagun taldea da, denak musikariak, duela 2 urte berriz abiatu direnak elgarrekin. Giro paregabea sortuko dutela dudarik ez.

Beti bezala Artetxea elkarteak egin pintxoak gozatzen ahalko dira ostatu xokoan.

Izturitzeko merkatuko laborariek, merkatu eder hori bizi iraunarazten duten erosle guziak eskertzen dituzte eta gomitatzen gaualdi goxo hortan parte hartzeratArtetxean.