Kontzertuak Epaiskan

Maiatzaren 29an (20:30), Berandu baino lehen taldea Epaiskan ariko da, ondotik (21:30) Zikin taldeari lekua uzteko.

Berben pozen jiran bertsotan

Maiatzaren 29an (19:00), bertsu saioa iraganen da Onintza Enbeita eta Oihana Aranarekin, Xalbat Alzugarai gai emailea izanen delarik. Hitzordua Biltxokon emana da.

Biltxokoko larunbatak

Maiatzaren 30ean (12:00), Physis versus Nomos taldea hurbilduko da Agustindarren karrikara. Ongi etorri deneri!

Komiki aurkezpena

Hilabetean behin, irakur klubak eleberri edo ipuin bilduma bat eztabaidatzen du. Aldi huntan, ekainaren 2an (18:15), Dom Campistron “Bekatorosak” bere komikia aurkeztera etorriko da Hiribarneko mediatekara.

Mintzaldi-debatea

Ekainaren 3an, asteartez (18:30), mintzaldi-debatea iraganen da Baionako Largenté ikastetxean, gaurko jendartearen erronkei buruzko gogoeta sustatzeko. Euskal Herrian sortu den talde batek antolatzen du, Semaines sociales de Francen ildotik, politika eta jendarte giro gero eta zatituago baten testuinguruan.

Bi hizlari ariko dira eztabaidan: Benoît Rauscher eta Marie-Christine Monnoyer. Gai nagusia hau izanen da: “Leon XIII.aren eta Leon XIV.aren erakaspenek zer balio dute gaur egungo mundua sendatzeko?”.

Bigarren partean, publikoari hitza emanen zaio. Eztabaidagai izanen da nola Euskal Herrian bizi diren esperientziek ekar ditzaketen erantzun egokiak eta adibide inspiratzaileak gaur egungo erronken aitzinean.

Zirko festibala

Oreka zirkoak antolatu festibala ekainaren 3tik 14ra iraganen da, plaza berdean. Besteak beste, heldu den asteazkenean, 3an (18:00), “Le Ministère des Affaires importantes” ikusgarria emanen da, inklusioan, prezio librean. Ondotik (19:30), Oreka Pistan izanen da, prezio librean hau ere. Heldu den astean bertze hitzorduak.

Pianoaren inguruan 3 kontzertu

Ekainaren 6 eta 7an, Baionako Tenplu protestanteak musika hitzordu berezia proposatuko du. Amarres elkarteak “Autour du piano” egitaraua antolatu du, tokiko artistei lekua emanez ehun urteko Pleyel pianoaren inguruan.

Hiru kontzertu eskainiko dira giro desberdinetan. Lehena, “Légendes”, larunbatean (11:00), publikoa Dvorak-en unibertsora eramanen duena, Chloé Barthélémy eta Jean-Pascal Guillot-en lau eskutako pianoarekin. Bigarren kontzertua larunbatean ere izanen da (17:00), “Entre deux mondes”, ahotsa eta pianoa uztartuko dira, Robert Schumann, Franz Schubert eta Frédéric Chopin-en obren inguruan.

Azken hitzordua igandean (17:00) izanen da, “L’alchimie des ombres” izeneko emanaldi mugitzailearekin, musika, antzerkia eta iruditeria fantastikoa nahastuko dira.

Kontzertuak publiko guziari idekiak dira, parte hartze librearekin, eta erreserbatzea gomendatua da: amarres64100@gmail.com.