Zokoako gotorlekua sendotzeko lanak prestatzen

Euskal Elkargoak Zokoako gotorlekua sendotzeko obren eskaintza deialdia zabaldu du. Itsasoari begira diren hiru zatitan erortzeko arrisku handia edo biziki handia identifikatu dute. Harlanduak sendotzea eta ainguraketak ezartzea aurreikusten da, baita aduanazainen harresia egonkortzea ere. Behin-behineko neurriak izanen dira, gunearen zaharberritze orokorraren zain. Enpresek urriaren 16ko eguerdi arte aurkez ditzakete beren eskaintzak.

Osasun gunea portuko farmaziaren gainean

Ziburuko Herriko Etxeak osasun gune bat antolatzeko egitasmoa abiatu du, portuko farmazia dagoen eraikinean. Bigarren eta hirugarren solairuak berrituko dituzte, mediku kontsultetarako gelak ezartzeko. Eskaileretan eta igogailuan ere lanak aurreikusiak dira. Obrak egiteko enpresen eskaintzak aurkezteko epea irailaren 10ean bururatu da. Egitasmoaren arabera, farmaziak lanean segituko du obrek iraun bitartean.

Adineko emazteak oholtzara gomitatuak

La Côte Folle konpainiak “Parmi les vaches” zirku ikusgarria emanen du urriaren 8an, ostegunez (19:00). Zahartzaroa, oroimenaren galtzea eta pertsonen arteko loturak ditu aipagai. Bezperan, urriaren 7ko arratsaldean, 70 urtetik gorako bost emazteri hiru oreneko tailer batean parte hartzea proposatzen die konpainiak, biharamunean ikusgarriaren eszena batean agertzeko. Ez da aitzineko esperientziarik behar. Izen-ematea: animations@mairiedeciboure.com edo 06 10 75 45 61.