Egun eta bihar | 2022ko Martxoaren 31a
Kasu eta kasu
J-B D
Badu orain bi urte baino gehixago izurritea aipagai dugula. Beste bi urtez hala izanen ote da? Hori dakiena isilik dago. Dakiguna da azken egun hauetan arrangurak berriz emendatu direla. Kontrako neurriak arinduak izanik bazen halako lasaidura bat. Horra nun gaitza berriz azkartzen ari den. Anitz tokitan eta gure eskualdean ere. Delta delakoaren ondotik jin zen Omicron eta hunen ume bat da orain gehienik kezkagarri bilakatua. Aitzinekoak baino kutsagarriagoa, gehienetan eriak ez badira ere arinki baizik joak izaiten. Kasu eta kasu, mediku eta ikerle anitzek ez dute besterik errepikatzen, erakustera emanez, edo garbiki erranezbatzuetan, neurrien arintze hori sobera goizik egin dela. Maska bereziki sobera goizik eta sobera aise kendu dela. Funtsean, lekuka segurik gero eta gehiago hasiak dira berriz ezartzen. Saltegietan bereziki eta jende anitz ibiltzen den beste toki askotan.
Gobernua haatik beti bere hartan dago. Neurrien arintze hori kenka egokian egin dela eta gisa guziz hurbiletik segitzen dituela gaitzaren gora-beherak. Bazterretik batzuk diote halako maltzur aire batekin nihundik ahalaz ez duela beste erabakirik aise hartuko hauteskundeak bi aste barne hor ditugularik. Gisa guziz, goazen bada kasu eginez eta maska eskupean atxikiz ez badugu ere aurpegian biziki ezartzen. Gaitza aitzina hedatzen balitz denen kaltetan bailitzake, hortaz nehork ez duke duda mikorik
