Jean-Claude Ayçaguer altzari maiasturua da, bere tailerra Donapaleun plantatua du. Badu hamar bat urte elizetako erretaula arraberritze lanetan ari dela. Tailerra bisitatzen ari ginela, Maite Estienne urreztatzailearen ezagutza egin dugu. Biekin solastatu gira.

Jean-Claude Ayçaguerren ibilbidea

Ebanistak betidanik zurarekin lan egiteko gogoa ukan duela erran digu. Ikasketak Baionan egin ondoren, Compagnons-ekin segitu zuen, 7 urtez Frantziako itzulia eginez. Euskal Herrira itzuli eta, ofiziale gisa plantatu zen Donapaleun, 1991n. Bakarrik lanean arizan zen 7 urtez, ondotik langile bat enplegatu zuen.

Zurezko sorkuntzez gain, konponketak ere egiten ditu.

Tailerrean aprendiz gazteak badira, gaur egun orotara 4 langile dira. Aprendizek eskolan lanbidea orokorki ikasten badute, tailerrean konponketa ere ikusten dute.

Teknika modernoak ezagutzeko, Jean-Claude Ayçaguerrek ikastaldiak egin ditu.

Erretaula berritze

Eraman zuen lehen lan handia Izurako Haranbeltz kartierreko kaperaren arraberritze lanetan parte hartzea izan zen, 2015ean. Izurako kapera klasatua izanik, Estatuaren kultur zerbitzua den DRAC-ekin (Direction Régionale des Affaires Culturelles) lankidetzan hasi zen. DRAC Frantziako Kultur Ministerioaren lurraldeko ordezkaritza da, eskualdeko prefekturarekin koordinazioan ari dena. Kultur ondarea, artea eta kultur politikak babestu, sustatu eta kudeatzea da haren eginkizuna, horietan monumentu historikoen zaintza eta zaharberritzea sartzen da, baita kultur-ondare higiezin eta ontasun higigarrien babesa. Hori dela eta, Jean-Claude Ayçaguerren taldearen lana ez da soilik lan artistiko hutsa, baizik eta kultur ondarearen kontserbazioaren parte ofiziala ere.

Besteak beste, Baionako katedralean, Luhuson, Baigorrin, Moneinen, edota Aire-Sur-l'Adour-en lanak eraman dituzte.

Orain, Esnazuko kaperako erretaularen konpontzen ari dira. Osoki desmuntatu dute, konponketak tailerrean egiten ari dira eta ondotik berriz muntatuko dute. Lan horren eramaiteko, 4 hilabete aitzinikusiak dira.

Maitena Estienne urreztatzailea

Donapaleuko tailerra bisitatzean, Maitena Estienne topatu dugu, zur urreztatzailea dena. Lurraldean bakarrenetarikoa da. Erretaularen konponketetan parte hartzen du Jean-Claude Ayçaguerrekin elkarlanean, baina hura urrezko hostoekin ari da. 22,5 karateko urre hostoak Parisen erosten ditu. Dekorazioetako urre-lanak berriz distiraraztea da haren lana, material eta teknika berdinak baliatuz. Xehetasun guziei kasu eman behar zaie. Arauak biziki zorrotzak dira, obra errespetatu behar baita. Egiten den lana ez da ageri izan behar eta hastapeneko egoerara itzuli ahal izatea da arauetarik bat. Lana hasi aitzin, egoeraren konstatazio txostena bete behar da, zer egiteko asmoa den idatziz. Ondotik etapa guziak idatzi behar dira, jakiteko zer eta nola egina izan den. Alde batetik DRAC-en arauak errespetatu behar dira, eta bestetik bezeroaren (Herriko Etxe edo parrokiaren) nahiak.

Lan biziki fina eskatzen du, hostoa ezin baita eskuekin hunki, hostoa errexki airatu daiteke edota hautsi.

Tailerra 450 Sardazeko karrikan kokatzen da, Donapaleun.

Jean-Claude Ayçaguerrek zioen erretretaren tenorea hurbiltzen ari zaiola eta bere ordezkatzeko norbait xerkatzen zuela.

Harremanetan sar daiteke 06-76-88-02-86 edo jc.ayçaguer@wanadoo.fr mailaren bidez.

Ebanistak www.ebeniste-pro.fr deitu webgunea badu.