Arno feria

Bazen mugimendu iragan asteburuan "Les vins de Vincent" deitu sotoaren inguruan. Alabainan bere hamabost urteak ospatzeko gertakari berezi bat apailatua zuen Vincent Damestoy soto zain famatuak. Duela zonbait hilabete, Hazparneko gunea ideki du, enpresaren bulego, puska bilgune eta saltegi gisa erabiltzen duena. Bi egunez, Frantzian barna ezagutzen dituen sotoak eman ditu ohoretan eta jendea gustura egon da arnoa jastatzen.

Erran behar da Hazparnen badela beste soto bat, lehenago plantatua. Hunek bere tokia hiri barnean du eta saltze arruntaz gain, larunbatetan merkatuaren karietara ostrak jan daitezke, arno on batzuekin bistan dena.

Hainbeste eskaintzarekin Hazparnen ez daiteke arno txarrik edan!

Garraio solidarioa

Elkarte batzuek eskaintzen diote laguntza hori bakarrik ibil ez daitekeenari. Beskoitzen kokatzen da gure eskualdean lan egiten duen elkartea. Hazparneko herriak ere badu bestalde gisa hortako eskaintza bat.

Elkarteak zerbitzua noiztenka edo molde jarraikian eskaintzen ahal du. Hurbileko joan jinak egiten dira edo ez urrun dagoen garraio publiko batzuetara.

Norentzat da eskaintza hori?

Hazparne inguruko 11 herrietako biztanleentzat. Astelehenetik ostiralera erabil daiteke (8:30-18:00). Asteburuetan ere bolondresik baldin bada.

Nola egin behar da?

06-95-14-88-47ra deitu xehetasun guziak ukaiteko edo erreserbaren egiteko (48 oren lehenago). Gehiago jakin nahi duen hazpandarrak ondoko zenbakia egin dezake: 06-52-43-70-10.

Jakin behar da ere elkarteak bolondresak xerkatzen dituela.

Loto

Jean Verdun eskolako burasoen elkarteak du loto bat antolatzen martxoaren 18an, Harana gelan zernahi sari ederrekin bistan dena. Gela 14:00tarik goiti idekia izanen da eta jokoa bera 15:00etan hasiko da. Han berean jaten eta edaten ahalko da elkartearen alde.

Libertimendua

Oraikoan Hazparne eskualdearen aldi da. Bazterrak inarrosiko dira heldu den larunbat goizean eta ondotik, nahi duenak pesta egiten ahalko du.