Nafarroan ere Sorionekuak egitasmoak euskara "etorkizunerako zubia" dela aldarrikatu du. Baztanetik Tuterara, zubiak euskararen normalizazioaren aldeko ikur bilakatu dira. Euriagatik bertan behera utzi duten manifestazioan, Blanca izeneko 30 urteko tuterarrak irakurri behar zuen gutuna sareetan argitaratu da. Euskaldun zahar, zein berriak, euskaldun ez direnei euskara helarazteko zubiak direla azpimarratu dute eta bultzada horretan laguntzeko deia egin da.

Euskal Herriko Emazteen Mundu Martxak herrien subiranotasuna eta bizitza duina aldarrikatu ditu. Bardeetatik abiatu martxak lurraren defentsa, migrazio politikak eta indarkeria matxistak ardatz ukan ditu. Hainbat herrietatik pasa ondotik, Donostiara etorri da.

Goizane Alvarezek, Gipuzkoako Aldundiko Kirol Departamentuko foru diputatuak iragarri du, 2026-2027 ikasturtean, Aldundiak eskola-kirolerako 60 euroko laguntza ezarri nahi duela. Salbuespen bakarra ikasle gutituak izanen dira, ez dute kirola programa honetan parte hartzeko ordaindu beharko. Gaur egun, eskola-kiroleko laguntzak desberdinak dira. Urtean batez bestekoa 102 eurokoa da. Egiazko kostua, eredu profesionalizatu batekin, diputatuak aurkeztu azterlanaren arabera, ikasleko 480 euro da. Gipuzkoako ikasleen %60ak eskola-kirolan parte hartzen du, baina laguntza gutiena duten 30 ikastetxeetan parte-hartzea %42ra apaltzen da, nesken kasuan %26ra. Ikastetxeen %70etan astean bi saio baino gehiago egiten dira. Begiraleen %75a profesionalak dira eta gaineratekoak boluntarioak.

Burlatako David Mirandak 5 kilo eta 250 gramoko izokina arrantzatu du, Villanueva inguruan (Kantabria). Gipuzkoako Igeldoko Rekondo jatetxeari 1.800 eurotan saldua izan zaio. Izaera sinbolikoko jarduera izan ohi da, ez arrantza denboraldiaren parte, duela hiru urtetatik debekatuta baita Bidasoako uretan izokinak arrantzatzea. Azken hiru urteetan egin moldean, aurten ere Nafarroako Gobernuak debekatu du Bidasoa ibaian izokinak arrantzatzea. Nolanahi ere, Landa Garapeneko eta Ingurumeneko Departamentuak baimena eman dio Berako Udalari izokinaren lehendabiziko alearen harrapaketa antolatzeko.

Hainbat Herriko Etxeetan "Euskal Herriko Pentsiodunen Mugimendua" sinadura bilketa iragan da. Ekimen horren helburua da gutieneko pentsioa, gutieneko soldatarekin berdintzea. Orain arte bildu diren sinadurak (120.000 baino gehiago) maiatzaren 15ean Eusko Legebiltzarrera eramanak izanen dira. Manifestazioa antolatua da: "gutieneko pentsioa = gutieneko soldata" lemapean. Antolatzaileek proposamena onartzea espero dute, legez behar diren 10.000 sinadura baino anitzez gehiago bildu dituztelako.

Terrorismoaren biktimen talde batek euskal hezkuntza publikoan haien ahotsa entzun ahal izatea eskatu du. Imanol Pradales Eusko Jaurlaritzako lehendakariari eskatu du beharrezko neurriak har ditzan euskal gazteek indarkeria terroristaren iragana ezagutu dezaten. Talde hori, ETAren, GALen, jihadismoaren eta eskuin muturraren terrorismoaren 25 biktimek osatzen dute. Haientzat, biktimaren testigantza hezkuntza-tresna eraginkorra da, gazteei ekintza terroristen ondorioak ulertarazteko eta horietan balio etikoak oinarritzeko, memoria, duintasuna, egia eta justizia aipatu behar dira. Talde horrek uste du hezkuntzan beharrezkoa dela lekukotasunak entzutea, "Biktimaren kontakizuna ezagutzeak terrorismoa deslegitimatzen laguntzen du. Gazteei gure historia hurbilean terrorismoak ukan duen eragina ezagutzeko duten eskubidea ez ebasteko". Bestalde, zeregin garrantzitsu honetan, guraso elkarteei eta irakasleei engaiamendua har dezaten dei egin...

Iratxe Sorzabalen haritik, EH Bilduk deitoratu du: "buruzagi politiko eta instituzional batzuen eta komunikabideen isiltasuna oso esanguratsua da. Isiltasun zaratatsuan mantentzen dira eta isiltasun hori, une honetan, ekintza konplize bihurtzen da. Torturarekin jarduteko erabili den inpunitate-estalgian sakontzen du". Ildo horretan, EH Bilduk ohartarazi du "egiarik, aitortzarik eta erreparatzerik gabe ezinezkoa da, benetako bizikidetza demokratikoa eraikitzea".

Afera horretan, Auzitegi Nazionalaren epaiak bi errealitate egiaztatzen dituela errana izan da: batetik, "euskal herritar asko, tortura jasateaz gain, espetxeratuak izan dira tratu izugarri eta ankerren pean egin adierazpenengatik", eta bestetik "torturatzaileak" daudela berretsi da.

Lehen alea urtero izaten da albiste, baina aurten gehien nabarmendu dena salmenta prezioa izan da. Kiloa 120 eurotan saldu da Avileseko lonjan, iazko 339 euroetatik oso urrun. Itsasoan 18 egun eman ondoren, Goienkale ontziak 525 kilo hegaluze harrapatu ditu.

Euskadiko Osasun Itunaren adituek "Lehen Arreta" indartzeko hainbat proposamen egin dituzte. Galdegina da psikologoak, optiko optometristak, nutrizionistak eta osasun administratzaileak gehitzea. Osasun administratzaileen eginbeharra izanen da pazienteen bereizketa egitea eta dagokion profesionalarengana bideratzea. Lantaldearen egitekoa ez da lehen arretaren egungo arazoei konponbidea aurkitzea (profesional falta), etorkizuneko eredua diseinatzea baizik. "Lehen Arreta"-ko lantaldeek egonkortasuna izatea ere ezinbestekoa izanen dute pazienteen jarraipena hobeki segitzeko. Bestalde, mahai gainean ezarri dute medikuen kuota (1.500 pazienteko mediku bat) tokian tokiko beharren arabera egokitzeko: adineko pertsona kopurua, egoera sozioekonomikoa, etorkin kopurua edota eri kroniko kopurua kontuan hartuta.

Urteetako gatazkari bukaera emateko asmoz, Enirio-Aralar Mankomunitateak eta Gipuzkoako Aldundiak Aralarko natur parkea datozen 10 urteetan kudeatzeko plana adostu da. Besteak beste, finantzazio eredua zehaztu da eta aurreikusi da estrategikotzat jotako hiru mendi bide zabaltzea. Akordioak Aralarko parke naturalaren oreka bilatzea du helburu eta bereziki abeltzaintza zaintzea. Aritzagako bidea egokitzea eta Elutxeta eta Pagabe inguruko larreetarako bide berriak zabaltzeko xedea da. Gogorarazia izan da: "Aralar gaur egun ezagutzen dugun modukoa izan dadin artaldeak mendian ibiltzea funtsezkoa izan da".

Gipuzkoako Foru Aldundiak urtero 350.000 euroko ekarpena eta beharrezko inbertsioak egiteko engaiamendua hartu du. Enirio-Aralar Mankomunitateak erakundearen egitura eta lan kostuak bere gain hartzeaz gain, Plan Orokorrean ekintza ezberdinak garatzeko behar diren baliabideak segurtatzeaz arduratuko da. Plana behin betiko onartu eta, erakunde bakoitzak berretsi beharko du,...