Haltzako Beñaten ikustera joan gira, Uztaritzera. Beñat Soulék gustura hartu gaitu bere etxean, Haltzagaraian, plazaratu berri duen "Baiguratik Lapurdira À¢'€'" Oroitzapen, Bertsu, Kantu" liburuaz solastatzeko. "Haltzak ez du bihotzik, ez gaztanberak hezurrik" dio aspaldiko kantuak. Beñatekin mintzatuz, haltzak baduela bihotzik erran dezakegu, Uztaritzekoak segurik bai. Duela bi urte, Villabonako (Gipuzkoa) Bertsozale elkarteak agertu zuen Beñaten bertsogintzako ibilbideaz artikulu sakon bat. Horrek zion Beñati zerbait osoagoren agertzeko tirria eman. Eta Euskaltzaleen Biltzarrari bere xedea aipaturik, honek gogotik argitaratu dio, lehenago "Neurtizlari Bertsulari Iparraldez" liburua argitaratu zion bezala (2011). Hara beraz Beñatek bigarren obra bidean ezarri duela, orain arte eraman duen biziaren eta idatzi dituen bertsuen lekuko paregabe.

Irisarritik Uztartitzera

Lehen zatian, Beñatek oroitzapen asko kontatzen dizkigu, Irisarri sorterrikoetatik hasirik, Uztaritzen bizitokia hartu arterainokoak, Urepele Lantziriko Annie-rekin ezkondurik, eta geroztikakoak ere. Umorez beteak batzuk, garratzagoak bertze zenbait, hala nola Peio semearen galtzea auto istripuz, 23 urtetan. Eta bere engaiamenduak, euskara, antzerkia, bertsularitza, abesbatzak, parropiako jarduerak, kazetaritza, bereziki Herria astekari honen berriketari jarraikia izaki, Maixan Minaberriren segida harturik, Uztaritzeko eta bertsu saioetako berriak emanez. Hor ere ahusagailuak, ihizia bereziki, eta pilota, batez ere errebote jokoa. Beñaten biziaz bada lerro horietan barna zer ikas.

Bertsu eta kantu

Gorago erran dugu Beñatek afizio zuela bertsuetan eta kantuan. 1975az geroztik ikusiko dugu bertsu saioen antolatzaile, gai jartzaile, irakasle, txapelketetan epaile, artetik Bertsuzaleen Elkarteko kide ere izanik. Eta bertsu idazle, 1988an hasirik. Eta hain zuzen, bertsu floka ederra agertzen digu bigarren zatian, 65ez gora, gertakari askoren karietara moldatuak. Eta 20 bat kantu, koruek galdeginik, bereziki Atsulai eta Lapurtarrak koruek. Liburu bukaeran, Xarlex bere aitaren eta Beñat aitonaren bertsu zenbait ere agerrarazten dizkigu. Hara nongo iturritik edana duen gure Beñatek.

Liburuak 198 orrialde ditu, kolorezko argazki politez apaindurik eta sar-hitza Peio Jorajuriak idatzirik (20€). Aurkituko duzue mementoan Beñat bera deituz (06-89-22-19-99 edo haltza-kobenat@orange.fr).