Donostiako Herriko Etxeak Rosa Zarraren omenez plaka bat eman zuen joan den azaroaren 8an, Amara Berri auzoan. “Poliziaren ekintzak eragindako biktima” gisa aitorturik, ahaideek “bakean” gelditu direla adierazi dute. Hiru hamarkadako borroka luzearen emaitza dela uste dute, haatik, ez dute “puntu eta amaiera” bat izatea nahi, azken hilabeteetako jazoerak direla medio uste baitute oraindik ere lanean segitu behar dela, berriz gertatuko ez delako bermea ezartzeko. Rosa Zarra 1995ean hil zen, Ertzaintzaren pilotakada batek ekarri zizkion zaurien ondorioz.

Baserri Bilgunea izena duen sindikatua aurkeztu zuten Donostian joan den azaroaren 3an. Eredu agroekologikoan ari diren baserritarren sindikatuaren helburua lehen sektoreko langileen interesak defendatzea da. Bestalde, “baserrietatik egiten den borroka agroekologikoaren erreferente sozial bihurtzeko” anbizioa du Baserritar Bilguneak. Agroekologiaren eta baserri ttipien garrantziaren aldarrikatzeko, Euskal Autonomia Erkidegoko administrazioaren aitzinean ahots bateratuarekin ariko da.

Aurtengo Rikardo Arregi kazetaritza-saria jakinarazi zuten joan den astean: Jakoba Errekondo agronomo, paisaia antolatzaile eta berri emaileak eskuratuko du. Epaimahaiak Errekondok “baratzea gure bizitzen erdigunean, izan hirian, izan baserri guneetan” ezarri duela goraipatu du.

Jakoba Errekondok baratzegintza-kazetaritza abiatu zuen duela 40 urte Euskadi Irratiko Landaberri saioan, duela 30 urtetik Argia astekariko Bizi Baratzea proiektuan eta baita Elhuyar aldizkarian ere.

Urean da San Juan itsasontzia, joan den aste hondarretik. Hor ziren Eusko Jaurlaritzako lehendakari Imanol Pradales, Gipuzkoako ahaldun nagusi Eider Mendoza, Euskal Elkargoko lehendakari Jean René Etxegarai, Pasaiako alkate Teo Alberro, Espainiako eta Kanadako gobernuetako ordezkariak, Unescokoak eta Kanadako mikmak komunitate indigenako Stephen Augustine.

Orain, azken fasean sartu dira bale-ihizi itsasontziaren eraikitze lanak. Albaola elkarteko langileak Pasaiako badiako portuan ariko dira, San Juan ontziaren barnean sokak, belak, aingurak, barrikak eta balea txalupak ezartzen. 2027an, San Juan Kanadara joanen da, bale-ihiztarien urratsetan.

San Juan kaitik urera aurtikitzeko momentuan, arrangura zen nagusi, ea nola atxikiko zuen. 50.000 kilo harri koskor ontzian sarturik, San Juan egonkorturik atxiki du uraren azalean. Albaolakoek aurrekariak ezagutzen zituzten. Hala nola, Vasa galeoia uretaratu zuten egunean hondoratu zen Stockholmen (Suedia), 1628an....

41 urte zituela, eritasunak eramanik zendu da Amaia Arrazola, Bartzelonan. Literaturan, paretetan, publizitatean eta beste hainbat arlotan ari izan da Gasteizko artista bere ibilbide osoan. Lan gehienak Bartzelonan eta Japonian egin bazituen ere, Euskal Herrian ere aurkeztu zuen obrarik. Iaz, adibidez, Gasteizko bestetako afixa lehiaketa irabazi zuen, Zeledonen jaitsiera lanari esker.

Horma irudietan ere proiektu anitz egin zituen Amaia Arrazolak. Horien artean, besteak beste, iaz Bartzelonan egin zuena, Gracia izena duen auzoan. 86 metro luzeko horma marraztu zuen Arrazolak, Gracia auzoari omenaldia egiteko. Lana urtaroetan banatua da eta urteko sasoi bakoitzean auzoan egiten diren hainbat besta eta jarduera irudikatu zituen. Aurten berean egin zuen azken horma irudia, Cirque du Soleil talde famatuaren ikuskizun baterako.

Behobia-Donostia lasterketaren 60. aldia irabazi zuten Raul Celadak eta Katherine Ruth Tisalemak joan den azaroaren 9an. Bestalde, Iraitz Arrospide eta Maite Arraiza izan ziren euskal herritar azkarrenak. Sekulan baino emazte gehiago ari izan ziren aurtengo Behobia-Donostia herri lasterketan.