Herriko bestak direlarik, larrazkena hurbiltzen ari dela marka! Aurten irailaren 12an, ostegun huntan hasiko dira, Hodi Aldean uda huntan iragan kabalkadaren parte bat proiektatua izanen da. Ostiral arrastirian (16:00-18:00) haurrentzat jostailuak izanen dira, trinketean Elite Pro pilota txapelketako finalerdiak (17:30), arratsean joan den astean aipatu bertsu afaria Jon Maia eta Nerea Elustondorekin (20:00), edo plazan "Chouffe gaua" Artzabale eta Frigo taldeek animaturik. Larunbatean trinketean pilota lehiaketaren segida (17:30) eta ondotik zikiroa Holakok alaiturik, txartelak 19:00tik harat salgai izanen dira. Igandean herritarren aperitifa, arratsaldean (16:30) "Behin bazen" Brilili zuberotar taldearen ikusgarria, kantaldia Bekatu taldea eta "Aiurri" ikusgarria Aukeran dantza taldeak emanik, ondotik animazioa txarangarekin. Bestak astelehenean bururatuko dira, goizarekin birla txapelketa (11:00), adinekoen bazkaria (13:00), Elite Pro pilota finala eta ohidura den bezala, ondotik aingira jatea herriko bi ostatuetan.

Lekondar guziek besta onak iragan ditzatela!