Hegoaldean | 2026ko Ekainaren 04a
Loiuko kalapiten ondotik
M.V.
Bingen Zupiriaren adierazpenak - Maiatzaren 23an Loiuko aireportuan ertzaintzarekin gertatu ziren kalapitei ihardukitzeko, Bingen Zupiria Eusko Jaurlaritzako Segurtasun sailburuak agerraldia egin du Legebiltzarreko batzordean, maiatzaren 26an. Oroit maiatzaren 23an heldu zirela Bilbora Global Sumud Flotilla ekimeneko kideak, Israelek kanporatu ondoan.
Hasteko, sailburuak onartu du Ertzaintzaren jokabidea “ez zela gertatu behar” eta barkamena galdegin du aireportuan sortu ziren kalapitengatik. Halaber, berretsi du Eusko Jaurlaritzak gaitzesten duela Israelek palestinar herriaren kontra daraman “genozidioa”, gehitu du Global Sumud Flotillako kideen aldarrikapenak errespetatzen dituela. Haatik, ertzainen egitateak justifikatu ditu, erran baitu kalapitak agenteen kontrako erasoen ondorio izan zirela. Gainera, tirabirak eragin zituztenak ETArekin eta “ezker muturreko” taldeekin lotu ditu.
Zupiriaren arabera, ertzainak aireportura joan ziren AENAren dei bat ukan baitzuten, Bilbon ospatu beharra zen nazioarteko errugbi finaleko bidaiariek arazo zenbait bazituztela seinalatzeko. Aldiz, ez zekiten flotillako kideei ongietorria egiteko elkarretaratzea izanen zela, eta 40 lagun baino gehiago bilduak ziren, aireportuko iritsiera-gunean. Hori ikusiz, agenteek flotillako kideei ongietorria egitera joanak zirenekin harrera egiteko gune zehatz bat adostu omen zuten. Baina sailburuak baieztatu du han bilduak ziren batzuek ez zituztela ertzainen aginduak bete, eta ekintzaileak heltzean egoera nahasi zela. Dena den, sailburuak erran du Ertzaintzaren Barne Arazoetarako Buruzagitzak ikerketa abiatu duela indarraren erabilpena kasu horietako ezarria den protokoloaren araberakoa izan ote zen argitzeko.
Oposizioko taldeen ikusmoldea - Segurtasun sailburuaren argibideek ez dituzte oposizioko taldeak soseguz bete eta bere mintzaldia “justifika ezina dena justifikatzeko” baliatzea leporatu diote. EH Bilduk eskatu dio neurriak hartu eta aldaketak egin ditzala horrelakorik gehiago ez gertatzeko. Lehen neurri gisa, istiluak sortu zituzten agenteak berehala kargutik kentzea eta polizia ereduaren eztabaidari lotzea galdegin dio.
Sumarrek, bere aldetik, adierazi du berehalako neurririk ez bada hartzen, sailburuaren dimisioagaldegiteaz beste aterabiderik ez duela ikusten.
Alderdi Popularrarentzat, berriz, Zupiriaren azalpenak egokiak izan dira zer gertatu den argitzeko, eta Ainhoa Domaika legebiltzarkideak eskerrak eman dizkio horrengatik. PS-EEk ere onartu ditu sailburuaren argibideak. Hala ere, “zarata gutxiago eta ikerketa gehiago” galdegin ditu Miren Gallastegi legebiltzarkide sozialistak.
Euskal Herriko Global Sumuden erantzuna - Euskal Herriko Global Sumudek onartezina kausitzen du Loiuko aireportuko tirabirak herritarrei leporatzea. Erakunde honen arabera, tentsioa ertzainak han izateak eta haien jarrerak sortu zuten: “Ertzaintza da gure kideen kontrako eraso bortitz, neurrigabe eta nahita egindakoaren erantzule bakarra”. Global Sumudek bi galde egin ditu: Zupiriak berehala dimisioa ematea eta Eusko Jaurlaritzak Israelekin dituen harreman eta kontratu guziak ezeztatzea.
