Eliza garbitzeko deialdia

Anitz hilabetez obrak eginik, Besta Berri kari ekainaren 29an eliza berriz idekia izanen da. Hori dela eta, elizari garbialdi on baten emaiteko borondatezko jendeak behar dira, interesatuek Herriko Etxera deitu behar dute 05-59-93-32-46 edo mailez mezua bidali mairie@macaye.fr. Izen emaiteko azken epea ekainaren 16a zen.

Kantari gazteak Zamudion

Jostakin elkarteak gazteekin kantua eta antzerkia lantzen du. Maiatz hondarrean kantu tailerrak segitzen dituzten hamar bat haur Zamudiora joan dira (Bizkaia). "Mundua edertzen" egitasmoaren baitan herriko Bertoko elkarteak errezibitu ditu, lapurtar eta bizkaitar gazteek elkarrekin kantuak, erritmoak eta koreografiak landu dituzte. Euskaraldia kanpaina baliatuz, azken egunean emanaldia presentatu dute. Asteburu horri esker harremanak sortu dira, euskararen sendotzeko eta kultura garatzeko aitzakia ere izan da. Dudarik ez da ondoko hilabeteetan Zamudioko gazteak herrian ikusiko ditugula!

Bestalde Jostakineko antzerkilari gazteak ere ari dira zerbaiten prestatzen, herriko besteetan emanen dutena.