Uztaritzeko kermeza

Parropian Haltsukoaren ondotik bigarrena da Uztaritzekoa igande huntan 22an iraganen dena. Meza nagusiarekin hasiko da (10:30), "Labourdins" musika elkarteak animatuko duena. Meza ondoan zintzur bustitzea eta bazkaria eginen dira Bixintxo eskolako aterpean. Txartelak tokian berean salgai izanen dira. Aurtengo berritasuna ondotik eginen den mus lehiaketa da. Parte hartzeko izenak eman daitezke oraino Apezetxean, parte hartze saria (10 euro taldeka) juntatuz. Inbido hordagoak oraino haizu izanen dira. Ongi etorri deneri.

Odol biltze

CCAS, herriko ekintza sozialen zentroak antolatzen du odol biltzea Uztaritzen heldu den uztailaren 9an asteazkenez. Odol biltzea "Etablissement Français du Sang" erakundeak eginen du Uztaritzeko herriaren partaidetzarekin. Iraganen da Bilgune gelan (15:00-19:00). Odol biltze horri garrantzi handia emaiten diote uda hurbiltzean beharrak beti handiagoak baitira. Erakundeak azkar kondatzen du uztariztarren mobilizazio eta parte hartzean.

Erakusketa

Erakusketa ezarria izanen da Haltya jauregian ekainaren 19tik 24a arte. Erakusketariak ama-alabak dira. Ikusten ahalko dira Andréa Roussillou amaren margoak eta Agnès Jouhandeaux alabaren argazkiak. Bisita tenoreak egun oroz dira (10:00-19:00). Ongi etorri hoberena segurtatzen dute.

Bozkatze

Herriko Etxeak antolatu aurrekontu parte hartzaile egitarauan bozkatze denbora abiatua da ekainaren lehenetik. Bozkatzea doakio bakarrik herrian bizi direneri. Herritik kanpo bizi direnek ere egin ahal izaiteko behar dute jada Uztaritzeko bozka zerrendetan izan. Interneten bidez egin daiteke edozoin egunez eta ere paper moldean Herriko Etxean antolatu permanentzietan. Paperezko bozentzat egunak gelditzen dira ekainaren 24a, uztailaren 1a eta 3a (17:30-19:30). Denentzat bozkatzeko azken epea uztailaren 15a da. Hamar proiektu dira lehian. Boza bali izaiteko emaile bakotxak behar ditu bortxaz 3 proiektu hautatu. Argitasun guziak aurki ditaizke herriko webgunean.

Eskuz Eskuk ateraldi

Ateraldi ona egin du Eskuz Esku elkarteak joan den ortziralean Garazi aldean. Autobusean joanik 70 bat lagun ziren bidaiari. Donibane Garazin geldialdia eginik, bakotxak bisitatzen zuela nahi zuen eraikuntza, saltegi, ostatu eta abar... Denak bildu dira gero Lasa Etxoineko jatetxean bazkari on baten preziatzeko. Erran gabe doa ondotik kantuak errexki airatu direla barne hartan eta denak poz handiarekin itzuli direla. Elkarteak bere ondoko biltzea ukanen du agorrilaren 2an, mus lehiaketarekin. Oraidanik ere hasten da prestatzen heldu den urteko primaderan ospatuko dituen bere 50 urteak, galdegiten die ere kideeri dauzkaten argazki batzu agertzea besta horri buruz. Doala elkartea beti aitzina.

Pilota

Euskal ligako txapelketak segitzen du. Huna Kapito Harrirentzat zonbait emaitza: luzean helduetan B taldeak irabazi du joan den larunbatean Txost Oiartzunen kontra 13/10. Igandean Hazparnen A mailakoek irabazi dute beren barradera partida garaituz USSP Amikuzeko taldea 13/5. Igande arratsaldean ere Bilgunen helduetan 3. mailakoek beren final-laurdena irabazi dute azkaindarren kontra 13/11.

Joko garbira jinez larunbatean gazte mailakoak nagusitu dira Goizeko Izarrari 40/9. Helduetan B mailakoak kanporatuak dira beren final-laurdena galdurik Goizekoren kontra 32/40. Gauden ondoko egunetako partiden beha.