Euskadiko medikuek bat egin dute espainiar estatuan deitua izan den grebarekin. Besteak beste, ordutegiak eta guardiak arautzeko eskatu dute. Donostiako osasun langileak protesta egiteko kanpora atera dira. Donostialdeko OSIko traumatologo Sara Lizeagak azaldu duenez lanuzteak jarraipen handiagoa izaten ari dira ospitaleetan eta kontsulta espezializatuetan.

Hainbat herritarrek "Erromesaldi herrikoia" egin dute, ekainaren 9tik 15era iragan dena. Aralarko San Migel santutegiko atea Pasaiatik, Albaola Itsas Kultur Faktoriatik, tenpluraino eramana izan da. Ate zaharberritua 2024ko urrian hautsia izan zen, eraso bandaliko baten ondorioz. Atea eramateko, ibilaldia zazpi etapetan egin da, atea artisau estiloan konpondua izan den lantegitik bere kokagunera arte. Atea idi-gurdiz eramana izan da, Albaolatik Astigarragara eta han oinez hasi da 86 kilometroko erromesaldia, Gipuzkoako eta Nafarroako 21 herri zeharkatuz. Santutegian ate berria jarri ondotik Mikel Garciandia apezpikuak meza eman du.

Eustatek 2024an, Araban, Bizkaian eta Gipuzkoan 2023an baino %3,8 sortze gutiago kontatu ditu, 1975 urtetik geroztik izan kopuru ttipiena da. Sortzeen kopuru handiena 30 eta 34 urte bitarteko emazteena da, sortze guzien %34,3. Ondotik, 35 eta 39 urte arteko amen umetzeak daude (%33,4).

Araban da apaltze handiena izan 2.094 sortzerekin (-%5,5), ondotik Bizkaian 6.421 sortze izan dira (-%3,7) eta Gipuzkoan 4.422 (-%3,2). Ama guzien batez besteko adina 33,4 urtekoa da, 2024an lehen aldiz ama izan zirenen batez besteko adina 32,4 urtekoa izan da. Amen jatorria kontutan hartuz, %26,6 espainiar estatutik kanpokoak dira eta 3.443 haur ukan dituzte. Beren sortzeko herrialde nagusiak hauek dira: Maroko (620 ama), Kolonbia (437), Nikaragua (208), Paraguai (201), Pakistan (196), Errumania (192), Aljeria (155), Honduras (137), Venezuela (117) eta Peru (108). 2024an ezkontzaz kanpoko sortzeak 6.541 izan dira, hau da sortze guzien %50,6. Sortzeen %93,5a ospitale...

Hegaluzeari dagokionean, Amaia Barredok aipatu duenez "kaza sistemarekin arrantzatzen duten eta berdel kanpaina ona izan ez duten ontzi gehienak jada itsasora atera dira hegaluzearen bila, eta dagoeneko lehen deskargak egin dituzte". Estatu espainolean hegaluze kuota 26 milioi kilokoa dela azaldu du eta dagoeneko 325.000 kilo inguruko lehen arrantzak egin dira, horietatik 140.000 kilo euskal flotek harrapatu dituzte. Hegaluzearen lehen harrapaketa horien batez besteko prezioa kiloko 9,60 eurokoa da. Sailburuak gaineratu du: "Arrazoizkoa den moduan, flota handiena, orain arte antxoaren kanpainan murgilduta egon dena, sartzen denean, espero dugu harrapaketek nabarmen gora egingo dutela eta horrek lehen salmentako prezioa jaitsiko duela".

Gipuzkoako eta Bizkaiko itsasaldeko arrantzaleek 7,2 milioi kilo antxoa harrapatu dituzte. Lakuako Elikadura, Landa Garapen, Laborantza eta Arrantzako Amaia Barredo sailburuak amaitutzat eman du antxoaren arrantzaldia. Adierazi du: "Aurtengo berritasuna da kuota arrantzale organizazioen arabera egin dute". Gipuzkoako eta Bizkaiko arrantzaleek 8.055.000 kilo arrantzatzen ahal zituzten, horietatik 7.200.000 harrapatu dituzte. Amaia Barredok kalkulatu duenez, gainerako %10 "bigarren seihilekorako eta hegaluzearen arrantzara joaten ez diren ontzientzat utzi da, beraz kudeaketa eredugarritzat jo dezakegu". Aurtengoan, batez besteko prezioa kiloko 2,05 eurokoa izan da, iazkoa 1,5 eurokoa izan zen.

1980ko hamarkadan girotutako telesail bat ko-produzitu dute Amazon Prime Video plataformak eta Espainiako TVE talde publikoak. Denak ongi joanez datozen egunetan La Frontera telesailean "La 1" kateak estreinatuko du. Istorioa testuinguru historiko jakin batean osatua da: 1986ko azaroaren 5ean, Hendaiako Sokoa enpresan "Sokoa operazioa" Espainiako eta Frantziako poliziek aurrera eraman zuten, bertan ETAren agiri anitz aurkitu zituzten. Bestalde, Frantziako gobernua hasia zen ETA kideak Espainiaren esku uzten. Guardia zibilek ETA kideak epaitegietara eraman aitzin hiru egunez atxikitzen zituzten. Beste alde batetik, TVEren informazioaren arabera, "Frantziak Espainia presionatzen zuen ETArekin negoziatu zezan". Txomin Iturbe orduko ETAko buruzagia 1987ko otsailean Aljerian hil zen, Espainiako...

Gazaren aldeko martxaren parte hartzera zihoazen 200 aktibista baino gehiago Egiptoko armadak joan den astean arrastatu edo atxiki ditu. Martxa horrek Israelek Gazan laguntza humanitarioa sartzeko ezarri blokeoa gelditzea du helburu. 30 bat lagunek osatu ordezkaritza Euskal Herritik joan da eta horietako 5 eta 10 artean atxikiak direla Maite Gartzia Podemos-Ahal Dugu alderdi politikoko kideak baieztatu du. Maite Gartzia bera Kairo Egiptoko hirian da, Podemos-ko beste hainbat kiderekin batera, martxan parte hartzeko asmotan joana. Azaldu duenez, arrastatzeak inongo indarkeriarik gabe egin dira eta Euskal Herritik hara joan diren guziak ongi dira. Arrastatu gehienak frantsesak dira (52), aljeriarrak (40), badira ere Maroko eta Libiako pertsonak. Hoteletan eta Kairoko aireportuan arrastatu dituzte, batzuk berriz beren herrialdeetara igorriak izan dira.

Euskarari buruzko ofizialordea hautatzeko prozesua gelditu da helegite baten ondorioz. 1.000 ertzain baino gehiago prestatu dira prozesu horretarako, baina ekainaren 18an epaile batek egitekoa zen proba behin-behinean gelditu du. Ertzaintzako ofizialordeak hautatzeko prozesua Gasteizko Administrazio Auzitegiak behin-behinean bertan behera utzi du. Epaitegiak argudiatu duenez, ofizialorde kategoriara igaiteko hautaketa prozedura arautzen duen 2022ko aginduaren kontrako errekurtsoari buruzko epaia fermurik ez dagoen bitartean ezin da prozesua aitzina eraman. Prozesu horretan euskararen ezagutzaren balorazioari buruzko oinarriei helegitea jarri du.