Lekornetik Aiherrara oinez eta Legazpitik Antzuolara

“Mugak Zubi Aiherra Antzuola” mendi ibilbidea gauzatzen ari da. Badu 39 urte bi herriak parekatuak direla eta urte bat huntan proiektu berri baten prestatzen ari direla. Azken honen helburua da bi herriak bi norabideetan lotzea, mendi ibilbide baten bidez, Aiherratik Antzuolara buruz edo Antzuolatik Aiherrara buruz (12 etapa, 200 km). Ondorioz, ibilbideak proposatu bidexketan gaindi ibiltzea nornahiri proposatua izanen zaio, modu librean, batzuk etapa guziak segidan egin nahiz, beste batzuk emeki-emeki, bakoitzak hautatu erritmoaren arabera.

Proiektu berria asteartean aurkeztuko baitute, ondotik xehetasun guziak emanen dauzkizuegu. Anartean aihertar eta antzuolarrek deliberatu dute elkarrekin oinez ibiltzea martxoaren 25ean, larunbatarekin, Lekornetik Aiherrara (ez eta Itsasutik joan den astean errana ginuen bezala) eta apirilaren 2an igandearekin Legazpitik Antzuolara. Bi ibilaldi horientzat, izena Herriko Etxean eman beharko da, martxoaren 23ko berantenaz. Huna egitaraua

Martxoaren 25ean, larunbatarekin, Lekorne-Aiherra ibilaldia (3 oren)

(9:00) - Aiherrako trinket ondoan elkarturik, autoz Lekorne eta Zelai arteko mugara joaitea.

(9:30) - Antzuolar eta aihertarren artean kafe-bixkotxa.

(9:45) - Lekorne-Lekuine-Aiherra oinez (10km, 3 oren)

(13:00) - Aiherrara heltzea.

Ondotik aperitifa eta bazkari hotza Herriko Etxeak eta Beltzuntze elkarteak deneri eskainia.

Apirilaren 2an, igandez,Legazpi Aiherra ibilaldia (4 oren)

(7:30) - Aiherratik Legazpira autobusez.

(9:00) - Antzuolar eta aihertarren arteko kafea.

(9:30) - Legazpi-Antzuola oinez.

Ondotik aperitifa eta bazkaria eta gibelera itzultzea (17:00).

Egun guziarentzat, bakoitzaren parte hartzea 10€-koa izanen da.

Antolakuntza errazteagatik, ibilaldi bat ala bientzat, izena martxoaren 23ko berantenaz eman beharko da, Herriko Etxera idatziz mairie.ayherre@wanadoo.fr edo deituz 05-59-29-64-02.

Ondoko hitzorduak

- Martxoaren 25a, larunbata: Lekorne-Aiherra ibilaldia, aihertarrak eta antzuolarrak elkarrekin.

- Martxoaren 25a (19:30): Abarratia pilota batasunaren biltzar nagusia, Aiherrako Denen Etxean.

- Apirilaren 2a, igandea: Legazpi-Antzuola oinez (autobusaren abiatzea 7:30).

- Apirilaren 15a, larunbata: aihertar eta antzuolar haurren artean animazioak Denen Etxean.

- Apirilaren 22a: “10. Freedom for Aiherra” kontzertuak Apairiko plazan.

- Maiatzaren?: Gozategia ostatuaren berriz irekitzea.

- Maiatzaren 13a larunbata (10:30): Beltzuntze batasunaren biltzar nagusia Denen Etxean.

- Ekainaren 16tik 19ra: Aiherrako pestak.