Sortze

Joan den astean, berri ona hedatu da. Bailleko Nathalie Etchegaray eta bere laguna Bixintxo Germain-i sortu zaizkiote beren lehen eta bigarren haurra. Alabainan, birazkakoak dira, bi nekatto, Leire eta Miren deitu dituztenak. Goresmenak burasoeri eta ongi etorri bi ahizperi eta bizi urosa desiratzen diegu.

Ezkoa aipagai

Aglaë Miguel artista eta grafistak ikerketak egiten ditu ezkoen inguruan (parilla, argizaiola, eskuargizaria, tracine, candelou… etab.). XX. mendea arte Euskal Herrian eta Pirinioetan baliatzen ziren ezko-argiak dira, ehorzketentzat eta ondoko dolu hilabeteetan erretzen ziren eliza aldaretan. Heldu den udan, Haran Ubel elkartearekin Alduden lan eginen du, gai horri buruz liburu baten asmatzeko. Argizari horien oroitzapenak eta irudiak (porroskak izanagatik ere) bildu nahi lituzke elgarrekin liburuaren aberasteko. Etxean baldin badituzue, edo nunbait ikusi baldin badituzue, heien baliatzeko maneraz istorio zenbait aditu baldin baduzue, menturaz zuen arbasoenganik, partekatzen ahal dituzue Aglaëri idatziz a_miguel@orange.fr edo 06-74-76-25-83 deituz. Erran gabe doa galderak ere ongi jinak direla.