Bleu Nuit antzerkia Larrekon

Nina eta Clairek elkar maite dute. Nina afroamerikarra, blueswoman, aktibista, esklabotasunaren aurka dabilena. Claire aldiz Iparraldeko euskalduna, ethno musikologoa, bere bidaian Estatu-Batuetako hegoaldean topo egiten du Ninarekin. Amodio horren gibelean, injustizia, arrazakeria, beltzen kontrako hilketak, egoera mingarria nabaritua da, kantuaren bidez. Larunbatean, martxoaren 25ean (20:30), antzerkia frantsesez, prezioa 16€, erreserba Euskal Herriko turismo bulegoetan eta sarreran bertan, Herriko-Etxeak antolaturik.

Senpereko Trail, emaitzak

Spuc Lasterka elkarteak gauzak ezin hobeki antolatuak zituen aitzineko asteburuan, haatik aro euritsuak oztopo batzu sortu ditu, halere lasterkaldi probak ongi iragan dira, 2.000 korrikalarik parte hartu dute. Emaitzetan, harriturik utzi gaitu Maxime Castillon bidartarrak egin duen balentriarekin, tontorrez-tontor 82 km-ko proban, aitzineko errekorra 40 minutuz jo du, 9:38 eginez. Lehen emaztea Poulain Nadege 12:39. Gotorlekuen itzulian 42 km, Goar Nieto Lopetegui, Ibarrako gipuzkoarra garaile 4:09, lehen emaztea Bidalun Anne 5:20. Igandeko Senpereko Trail delakoan 21 km, gure herriko enpresa batean lan egiten duen Camacho Jerome-ri nagusitu zaio doi-doietarik Bretaniako Heloury Yves 1:40, lehen emaztea Dinclaux Sarah 2:04. Haurrek ere bi mailetan parte hartu dute, aldiz oinezkoen ibilaldiak aro txarrarengatik ezeztatuak izan dira. Alabainan, publiko gutixago hurbildu da, alta besta giroa nagusi izan da eta haurren partehartzeak halako freskotasun bat ekarri du. Datorren urte arte.

Adinekoen aktibitateak

Hirugarren adinekoen elkarteak apiriletik abian du adinekoen Yoga tailerra, asteazkenero (9:30-10:30). Karrikarte gelan iraganen da, hilabetero 8€ko parte hartzearekin, deitu: 06-14-85-69-80.

Errugbiari so

Igande huntan, multxoetako azken partida dute gure kirolariek Gazteluko kirol zelaian. Usaia oneri ihes ez egiteko, “Laguntzaileen Eguna” antolatua da, karia hortara eskainia da modu guzietako laguntzaileeri apairu ederra. Billere/Lescar-ek osatzen duten ekipoaren kontra ariko dira, haueklehenbizikoak dira sailkapenean, gureak aldiz bosgarren. Denboraldi hasieran planta txarrean ibili badira azken postuetan, aldiz negu betean emeki-emeki bizkortuz joan dira, baita kanpoan ere irabazten hasi. Ea sorpresa on batekin erantzuten duten talde gotor horren kontra, denboraldiaren segida eskuetan dute.