Igandean Landarbaso abesbatza elizan

Emozioaren inguruan eraikia du bere proiektua, nun interpretatuko dituen obra desberdin frango. Otsailaren 6an (18:30) eliza berotuan, obra tradizionalak, erromantikoak eta garaikideak emanen ditu, pianoan eta a-capella. Ikuskizun zoragarriaren zuzendaria Iñaki Tolaretxipi izanen da, Euskal-Herriko eta nazioarteko konpositoreek beren laguntza eskaini dute hunen prestatzen. Erran gabe doa, goi-mailako ikustaldia izanen dela, jadanik hunen ikusteko parada ukan dugu eta aldiro ongi gozaturik gelditu gira. Senpereko Kultur eta Ondare elkarteak antolatzen du, prezioa 15€, ikasle eta 18 urtez-pekoentzat 10€, Euskal-Herriko turismo bulegoetan, cultureetpatrimoinesenpere.fr webgunean, baita sarreran bertan.

Ihauteriak etxez-etxe

Ohidura onak ez dira aldatzen, urtarrilaren 21etik otsailaren 12a arte, larunbat guziz, gazte tropela ederra, kantu eta dantzez animaturik, gure etxetara hurbiltzen dira ihauterien ongi ospatzeko. Gure harrera hoberena zor diegu. Zakuzaharrak elkarteak ekimena antolatzen du, kartier batzuetan ibiliak dira jadanik eta ontsalaz ez dute nehor hutsegiteko esperantzarik. Azkeneko ateraldian ezin hobeki alaitu dute Urguriko auzoa, besta giro polita sortuz Zaldubiko gunean. Garai batean"xingar eta arroltze edo bertze" eskatzen zuten afari on baten menturan, oraingoan zuek ikus, dirua edo edariarekin ere ez litzateke haserre.

Abisua: udako sasoiarentzat lan eskaintzak, urtero Herriko Etxeak zabaltzen ditu lan eskaintza hori, hilabete batez lan egiteko, uztailean edo abuztuan. Lan eskaintzak idekia da 18 urtez-goitikoeri, lan mundua deskubritzea, baita jornal baten eskuratzea beti onuragarri baita.

Heriotze

Joan den astean ehortzia izan da Urguri-Antzolako Graxi Zamora, sortzez Sarasola, 92 urterekin. Herritar andana bildu da gure elizan kartsutasunean, kantu eta otoitzen artean. Lau haurren ama hau, Ganixon bere senar zena lagun, etxaldeko laneri lotu da, bere bizitzan xumeki, bainan beti alai, laketa eta eleketari paregabea. Duela 10 urte senarra galduz geroz, bere ahalmenak ttipituz zoazkion, halere etxean egon da bururaino, familiaz eta artatzailez ongi inguraturik.

Gure partez dolumin bizienak penetan gelditzen den familia guziari.

Larraldeko Bertso-Krakada

Amotz Larraldeko behitegian ginuen hitzordu bikaina bi bertsulari ospetsuekin, Amets Arzallus eta Julian Soto. Irabazi txapelak etxean utziak zituzten eta nola ez zen epai-mahairik hauen ariketen baloratzeko, askatasun osoz beren talentua azaldu dute, plazer handiarekin eta publikoaren atseginetan. Krakadaren aitzakian sekulako emanaldia eskaini dute, jolasean ari balira bezala, holako baldintzetan nola ez daiteke maitatu bertsularitza?

Hurrengo bertsu saioa, martxoaren 13an, Bectso Saioa.

Iragan ekitaldiak - "De Magellan à Elkano" mintzaldiak partehartzaile parrasta bildu du Inharrian, Delacour-en hitzaldi ongi dokumentatuaren entzuteko. Ordu berean mediatekan Zintzo Garmendiak aipatu ditu emazteen lekua ihauterietan, baita mozorroa eta pertsonaien garrantzia, debateak gauerdi pasa atzeman omen du.