Horiek hola, Olivier Véran osasun-ministroa bera ere harritu da eta jakinarazi du ikerketak funtsez eginen direla xuxen finkatu beharrez non zer den egia. Nun izaiten ahal diren holako izigarrikeriak, izigarrikeriarik baldin bada.

Liburu hori agertu bezen laster oroitarazia izan zauku bestalde duela hogoi bat urte jadanik arras xeheki akuilatu ikerketa batek salatu zuela xahar anitzek ederrak pekatzen zituztela bai xahar-etxetan bai eta berdin beren etxetan. Urrats on asko egin zen gero bainan ez aski eta luzara berriz lerratu bide txar batzuetara. Xaharren osagarriaz baino axola gehiago lekuka segurik xahar horieri esker gero eta sos gehiagoren biltzeaz.

Gutien ustean aditzen dira gauza asko kasik ezin sinetsiak. Hala nola jakin den berrikitan Parisen gertatu den hori. 84 urteko gizona karrikan erori da eta nehork ez du lagundu, lurrean utzia izan da zonbait oren nehork den gutieneko kasurik egin gabe! Hauteskundeak hurbiltzen ari-eta,hautagaiak ariko...

Entzun bada azken egun hauetan bereziki zer kondatzen duten berri-sail guzietan! Alde batetik biziki polliki erraiten daukute gero eta jende gehiago hunkitzen dituela izurrite tzar horrek. Bainan bestetik, solasa berdin goxo eta leun, gaitza gibelera ari dela, kontrako neurriak laster arintzen ahalko ere direla beraz. Beti galde bera heldu zauku burura: holako solas desberdinak entzun behar ditugula-eta, ez denez ba hor nunbait bitxikeria pisu bat? Oro har eta denen buru, ez direnez gutaz trufatzen eta ez guti azkenean!

Duela 60 urte, Aljeriako gerla bururatzeko keinka hartan izan ziren han gaindi gertakari zinez izigarriak, edo izigarriak baino izigarriagoak ere! Bi aldiz segurik frantsesak elgarri tiroka, zernahi hil eta kolpatu. Emmanuel Macron mintzatu da ezin ahantziak diren gertakari latz horietaz. Ez orduko eztabaida saminak berriz hazi nahiz bainan gertakari ilun horiek salatuz eta bakea gogoan. Batzuk erranik ere "zango-beltz" delakoen bozak bildu nahiz mintzatu dela, egia da ere holako solasak on direla bazterren nolazpait lasaitzeko, baitute oraino lasaitzearen beharra!

Ezkerralde hortan, bozkatze berezi bat izan da presidente-bozeri buruz, frango bitxiki muntatua zazpi hautagai baitziren eta horietarik hiru segurik ez ados holako urratsa hola egiteko! Christiane Taubira atera da lehen, Yannick Jadot "berdea" bigarren, Jean-Luc Mélenchon "intsumitua" hirugarren. Eta orain zer gertatuko da? Norbaitek gibelera eginen ote du Taubira laguntzeagatik? Ez aise den hoberenetik! Bera untsa harro dago partida irabazirik bainan itxuren arabera erretxena dauka eginik.